Ministria e Brendshme e Turqisë (MBT) tha të dielën se 2 “terroristë” e kryen një sulm me bombë para ndërtesave ministrore në Ankara, duke shtuar se njëri prej tyre u vra nga shpërthimi, ndërsa tjetri u “neutralizua” nga forcat turke.
Ministri i Brendshëm i Turqisë, Ali Yerlikaya, tha në rrjetin social X se 2 oficerë të policisë turke u plagosën lehtë gjatë incidentit që ndodhi në orën 9:30 të dielën.
Nuk dihet deri tani se kush mund të jenë sulmuesit. Grupet militante kurde dhe të ekstremit të majtë, si dhe Shteti Islamik kanë kryer sulme vdekjeprurëse nëpër Turqi në të kaluarën.
Yerlikaya tha se sulmuesit mbërritën në kompleksin ministror me një veturë të vogël komerciale.
Në pamjet e publikuara nga vendi i ngjarjes shihen ekipet e shpëtimit duke punuar pranë një veture të parkuar në zonën pranë Parlamentit të Turqisë dhe ndërtesave ministrore.
Policia e ka mbyllur qasjen në qendër të qytetit, shkruan Gazeta Express.
2 oficerët e plagosur po trajtohen në spital dhe gjendja e tyre nuk është e rëndë, sipas mediave lokale.
