Emisari i BE-së për dialogun Kosovë-Serbi, Mirosllav Lajçak, ka zhvilluar takim me emisarin gjerman, Jens Plotner, francezin Emmanuel Bone, dhe atë italian, Francesco M. Talo. Pjesëmarrës ishte edhe I dërguari i ShBA-së për Ballkanin Perëndimor, Gabriel Escobar.
Lajçak tha se temë bazë e diskutimit ishte situata në veri të Kosovës dhe hapat e ardhshëm drejt normalizimit të raporteve Kosovë-Serbi në kuadër të bisedimeve brenda dialogut, shkruan Reporteri.net.
Pavarësisht sulmit të djeshëm terrorist në veri, ku si pasojë ka mbetur i vdekur një pjesëtar i Policisë së Kosovës, Emisari Lajçak, në cicerimën e tij, zhvillimet e fundit i sheh thjeshte si “situatë në veri të Kosovës”.
“Diskutime intensive dhe shumë substanciale me këshilltarët diplomatikë Bonne, Plotner, Talo dhe DAS Escobar. Diskutuam hapat e ardhshëm në implementimin e Marrëveshjes drejt Normalizimit të raporteve dhe situatën në veri të Kosovës. Mirënjohës për mbështetjen e fuqishme”, ka shkruar ai.
Me njoftimet e tij, Lajçak po vazhdon ta krijojë një narrativë pak të devijuar, duke mos e paraqitur sulmin terrorist si një akt të dhunës, që për pasojë pati vdekjen e policit Afrim Bunjaku por më tepër si një zhvillim politik, për çka nevojitet zgjidhja përmes dialogut.
Kohë më parë, Kryeministri i Kosovës, Albin Kurti, pas takimit të 14 shtatorit në Bruksel,e akuzoi emisarin Mirosllav Lajçakse ka një koordinim mes tij dhe Presidentit të Serbisë, Aleksandar Vuçiq.
Ai ka thënë se pasi propozoi një plan të sekuencimi të punuar nga Republika e Kosovës, presidenti i Serbisë dhe Miroslav Lajçak reaguan me të njëjtin mendim dhe me të njëjtën shpërfillje të koordinuar.
“Presidenti i Serbisë dhe Miroslav Lajçak reaguan me të njëjtin mendim dhe me të njëjtën shpërfillje të koordinuar. Të dy thanë që ky plan është shumë jorealist”, tha Kurti.
Policia e Kosovës, në aksionin e djeshëm raportohet se ka eleminuar katër terroristë, ndërsa ka arrestuar dy të tjerë, duke përfshirë arrestimin edhe të katër civilëve të cilët janë kapur në posedim të radiolidhjeve. Ata dyshohet se kanë asistuar grupin e armatosur gjatë kohës kur Policia e Kosovës ishte vënë në ndjekje të tyre.
Aktualisht, situata në veri të Kosovës raportohet të jetë e qetë
