Ymeri: Kurti e ka keqkuptuar dialogun me Serbinë, e mendonte shumë më lehtë se sa që është

Analisti politik, Visar Ymeri tha se deklaratat e kryeministrit Albin Kurti në drejtim të emisarit të BE-së, Miroslav Lajçak tregojnë një mosbesim gati absolut ndaj BE-së.

Ai në “Debat Plus”, tha se nëse ky mosbesim ekziston procesi i dialogut duhet të ndërpritet apo të ndërrohen akterë

Sipas tij kryeministri Kurti e ka keqkuptuar dialogun me Serbinë duke besuar se është shumë më lehtë se sa që është.

“Në një proces negociator ku njëra nga palët, si Kosova tregon mosbesim gati absolut, karshi ndërmjetësit, pra BE-së, atëherë ai proces duhet të ndërprehet ose dikush nga akterët të ndërrohet. Kurti dje mundohej të thotë se problemin e ka me Lajcakun, por problemin e ka me BE-në, sepse Kurti ka problem me këtë lloj të procesit të dialogut, për dy arsye. Një që duke e shiku nga jashtë e ka keqkuptua procesin e dialogut, e dyta kur është fut brenda ka pasur më shumë besim në aftësi të veta se sa që është dashur të ketë. Më shumë besim te aftësitë e veta prej një intelektuali, diplomati e politikani”, tha ai.

Tutje ai tha se Kurti ka besim të gabuar kur mendon se Kosova ka fuqi të ndikoj te fuqitë e mëdha botërore.

“Kogja besim të madh të gabuar e tepruar në fuqinë e Kosovës për të vendos agjenda qysh do Kurti. Kurti e ka një personalitet megaloman politik, nuk len problem në botë pa ta zgjidhë në kamera. Pastaj këtë e projekton pastaj si një lloj fuqie e Kosovës si shtet e shqiptarëve në përgjithësi. Kur nisesh me këtë mendon që vetë prania jote mund t’i ndryshoj gjërat. Sepse mendon që të tjerët kanë qenë tradhtarë”, tha ai.