Në kuadër të konferencës “Të kuptojmë dobësitë e Kosovës në shëndetësi dhe mjedis”, të premten u zhvillua diskutimi për sfidat e Fondit të Sigurimeve Shëndetësore dhe Programin për trajtim mjekësor jashtë institucioneve publike, raporton Inlajmi.
Ndërsa ishte pjesë e konferencës, ministri i Shëndetësisë, Arben Vitia, bëri një vlerësim rreth gjendjes së Klinikave në QKUK, ndërsa theksoi se në disa klinika me një investim të vogël, nuk ka nevojë të kërkohet trajtim jashtë vendit.
“Tash hapur dhe pa perde. ‘Pikat e zeza’ në QKUK sa i përket perspektivës që ju e ngritët për momentin është Ortopedia. Një numër i madh i pacientëve për shkaqe të cilat munden me investime të bëhen këtu, vazhdojnë të kërkojnë trajtim jashtë vendit. Por duhet ta them këtë që një pjesë e pikave të zeza në QKUK është një problem sepse ka pika të zeza janë nëpër spitalet regjionale dhe kjo në gjashtëmujorin e fundit është duke u trajtuar me një seriozitet dhe me një dinamik që nuk mendoj që kanë që më herët”, tha Vitia
Sipas tij 1.6 milionë banorë dhe me një sistem shëndetësor jo të mirëfilltë, buxheti aktual është i pamjaftueshëm.
“Kemi vendosur që në Bordin e SHSKUK së paku çdo tre muaj të kemi një mbledhje sepse mendoj që investimet strategjike të bëhen në koordinim edhe me Bordin e Fondit për Sigurime Shëndetësore. Secila rrugë ka sfida dhe ne e kemi bërë një Udhëzim Administrativ dhe natyrisht sfida e parë do të jetë implementimi i duhur i këtij Udhëzimi”, u shpreh ministri Vitia./InLajmi/
