Anëtari i Parlamentit Evropian dhe i dërguari i Gjermanisë për Ballkanin Perëndimor, Manuel Sarrazin, tha, përpara raundit të ri të dialogut ndërmjet Beogradit dhe Prishtinës në nivelin më të lartë në Bruksel, se “nuk ka entuziazëm të madh”, por se ai duhet të jetë optimist se do të bëhet një hap i vogël përpara drejt zgjidhjes së çështjeve aktuale.
“Nuk ka entuziazëm të madh se do të ndodhë një përparim i madh, bëhet fjalë për hapa konkretë për deeskalim në veri të Kosovës, për të hapur derën dhe për të filluar në një rrugë pozitive. Ne kemi nevojë për lajme të mira në rajon”, theksoi Sarrazin.
Ai shprehu shpresën se dialogu, së bashku me punën e palodhur, “do të tregojë një rrugë pozitive me hapa të vegjël”.
I pyetur se çfarë mund të arrihet pas një raundi të dialogut, ai thotë se plani i deeskalimit i BE-së është që të 2 palët të shkojnë drejt tërheqjes së forcave policore dhe zgjedhjeve për kryetarë të rinj në 4 komuna në veri të Kosovës.
Kryetarët e komunave, nënvizon ai, duhet t’i shërbejnë qytetarëve të thjeshtë.
“Ne do të shohim se sa larg do të shkojmë, por është e rëndësishme të fillojmë të punojmë përsëri për të,” tha Sarrazin, duke theksuar se si diplomat ai duhet të jetë optimist ndonjëherë.
Zgjidhjen e dialogut ai e sheh vetëm përmes Asociacionit dhe Marrëveshjes së Ohrit.
“Mendoj se është e qartë se bashkësia ndërkombëtare pret që pala kosovare të lëvizë dhe se Asociacioni do të zbatohet siç është rënë dakord, në përputhje me Kushtetutën e Kosovës”, ka thënë ai.
Siç thotë ai, presioni politik për të arritur de-përshkallëzimin është “shumë i lartë” dhe të 2 palët duhet të dëshmojnë se do të japin diçka.
Sipas tij, absolutisht më e rëndësishme është që jeta në veri të Kosovës të normalizohet, të përfundojë frika nga dhuna, që njerëzit e zakonshëm t’i kthehen jetës normale, veçanërisht në 4 komunat me shumicë serbe.
Siç shtoi ai, të gjithë qytetarët në Serbi dhe Kosovë duhet të bëhen qytetarë të BE-së “pa kufij të fortë”, raporton N1, transmeton FrontOnline.
“Përshkallëzimi e ka vështirësuar rrugën e zgjerimit për rajonin. Ka një përshkallëzim mes Kosovës dhe Serbisë dhe është toksik për të gjithë rajonin, duhet progres, që të ketë një të ardhme evropiane për Serbinë, Kosovën, gjithë rajonin ”, tha Sarrazin.