Shefi i Grupit Parlamentar të Aleancës për Ardhmërinë e Kosovës AAK, Besnik Tahiri, tha se partia e tij do të iniciojë seancë të jashtëzakonshme për Ligjin për pagat, konkretisht koeficientin e pagave, raporton InLajmi.
Ai ndërsa paralajmëroi seancë të jashtëzakonshme kuvendare, kërkoi që koeficienti i pagës të jetë 129 euro e jo 105 sa ka vendosur Qeveria.
Për rritjen e koeficientit të pagës, Tahiri kërkoi mbështetjen e deputetëve, në mënyrë që të votohet një rezolutë që e obligon Qeverinë që ta fusë këtë ndryshim në Ligjin për Buxhetin.
“Kemi neglizhim total të kësaj Qeveri ndaj administratës shtetërore, për Ligjin e pagave po kërkojmë seancë të jashtëzakonshme. Koeficienti duhet të ngitet nga 105 në 129 së paku dhe për këtë presim që të kemi mbështetjen e deputetëve. Kjo duhet të ndodh tani që të bëjmë një rezolutë që Qeveria në buxhet ta fusë vlerën në 129 euro , nëse kjo nuk ndodh ne do të iniciojmë një nismë ligjore për ndryshimin e Ligjit për buxhet”, tha Tahiri.
Ndëkohë ai foli edhe për takimin e 14 shtatorit në Bruksel, ndërsa u shpreh se Albin Kurti e ka degraduar tërësisht këtë proces dhe se po pranon që të diskutohet për çështje të brendshme.
“Në Bruksel dialogu ka degraduar totalisht, në një situatë kur do të duhet të ketë qartësi, ajo që ka bë Kurti ka pranuar që të diskutohet për çështje të brendshme, në vend se të diskutohet për këto çështje në Kosovë”,theksoi Tahiri./InLajmi/