Deputeti i Lidhjes Demokratike të Kosovës, Avdullah Hoti, vazhdon kritikat ndaj qeverisë Kurti, ndërsa “akuzon”, ekzekutivin për shpenzim të “keq” të buxhetit, përcjell InLajmi.
Ndërsa kujton keqmenaxhimin e buxhetit, Hoti tha se pas dështimeve në çdo fushë, qeveria aktuale po shpenzon buxhetin përmes subvencioneve.
Sipas tij, kjo lloj politike buxhetore shpërfaq varfërinë në dije të këtyre që po qeverisin e as praktikantë nuk mund tu thuash më, sepse praktika zgjatë gjashtë muaj deri në një vit.
Hoti ka thënë se Qeveria Kurti nuk ka ide se si tërhiqen investimet, si prioritizohen investimet publike apo si sigurohet vlera maksimale për paranë e shpenzuar nga buxheti dhe se tash ia ka mësyrë shpenzimit të buxhetit përmes subvencioneve.
Postimi i plotë i tij:
Pas dështimeve në çdo fushë, ia kanë mësyrë shpenzimit të buxhetit përmes subvencioneve.
Subvencionim i pajisjeve shtëpiake!
Subvencionim i energjisë elektrike!
Subvencionim i librave për nxënës!
Mos u çuditni kur të subvencionohen policët për uniformë dhe këpucë, apo pacientët për barnat nga lista esenciale, pasi po dështojnë tenderët në vazhdimësi për arsyet që vetëm ata i dinë.
Kjo lloj politike buxhetore shpërfaq varfërinë në dije të këtyre që po qeverisin. As praktikantë nuk mund tu thuash më, sepse praktika zgjatë gjashtë muaj deri në një vit.
Pas 3 vitesh në qeverisje, është e qartë se ide nuk kanë për politika fiskale e buxhetore në kushtet e ekonomisë së tregut dhe konkurrencës vendore e të jashtme.
Ide nuk kanë si tërhiqen investimet, si prioritizohen investimet publike, apo si sigurohet vlera maksimale për paranë e shpenzuar nga buxheti.
Krejt çfarë dinë është subvencionimi përmes platformës ‘eKosova’, duke i kushtuar shtetit shumë më shtrenjtë./InLajmi/
