Kryeministrja e Serbisë, Ana Brnabiq, ka thënë të marten se pajtohet me ambasadorin gjerman në Prishtinë, Jorn Rodo, që Marrëveshja e Ohrit (Aneksi për Zbatimin e Marrëveshjes për Rrugën e Normalizimit të Marrëdhënieve ndërmjet Kosovës dhe Serbisë), e arritur në mars të këtij viti, duhet të zbatohet urgjentisht, transmeton InLajmi.
“Unë pajtohem që duhet të ketë zbatim të menjëhershëm të Marrëveshjes së Ohrit, që do të thotë, në fakt, në pikën e parë, zbatim të menjëhershëm të të gjitha marrëveshjeve të mëparshme, që është Marrëveshja e Brukselit. Kjo nënkupton formimin e Bashkësisë së Komunave Serbe në përputhje me Marrëveshjen e Brukselit”,
tha Brnabiq për RTS, përpara raundit të ri të dialogut ndërmjet Beogradit dhe Prishtinës më 14 shtator në Bruksel.
Sipas saj, është afër fundit të vitit 2023, dhe Marrëveshja e Brukselit (nga viti 2013) ende nuk është zbatuar dhe as nuk është formuar Asociacioni.
“Prishtina jo vetëm që nuk ka ndërmend ta zbatojë atë, por (kryeministri i Qeverisë së Kosovës) Albin Kurti nuk dëshiron të thotë se Marrëveshja e Brukselit, për të nuk ekziston. Komuniteti ndërkombëtar vazhdon ta tolerojë atë”, tha ajo.
Brnabiq tha se Serbia ka marrë garanci “se kjo do të ndodhë në janar, shkurt”, si dhe se komuniteti ndërkombëtar do të insistojë në formimin e Asociacionit.
“Dëgjuam nga bashkësia ndërkombëtare që nëse Albin Kurti nuk e dëshiron, do ta vendosin vetë në përputhje me Marrëveshjen e Brukselit. As këtë nuk e pamë. Ne pamë krejtësisht të kundërtën, përshkallëzim shtesë”, tha kryeministrja.
Ambasadori gjerman në Prishtinë, Jorn Rode, ka vlerësuar të hënën se takimi i ardhshëm mes presidentit serb Aleksandar Vuçiq dhe kryeministrit të Kosovës Albin Kurti vjen në një “moment kritik”, dhe se Marrëveshja e Ohrit “duhet të zbatohet menjëherë”./InLajmi/
