Kryetari i Aleancës për Ardhmërinë e Kosovës, Ramush Haradinaj, i ka ndarë mirënjohje nënkryetarit të Kuvendit të Kosovës, Ilaz Ramajli, me rastin e 33-vjetorit të aprovomit të Kushtetutës së Kosovës e njohur si Kushtetuta e Kaçanikut, përcjell InLajmi.
Haradinaj është shprehur se guximi dhe vizioni i delegatëve të asaj kohe, ishte bazë e fortë e shtetësisë dhe pavarësisë së Kosovës.
Siç u shpreh Haradinaj delegatët e Kuvendit të Kosovës aprovuan Kushtetutën e Kosovës, si akti që e ndau Kosovën prej Serbisë dhe Jugosllavisë së atëhershme, e njohur si Kushtetuta e Kaçanikut.
Postimi i plotë i Haradinajt:
Para 33 vjet, në Kaçanik delegatët e Kuvendit të Kosovës aprovuan Kushtetutën e Kosovës, si akti që e ndau Kosovën prej Serbisë dhe Jugosllavisë së atëhershme, e njohur si Kushtetuta e Kaçanikut.
Sot në Kaçanik, me konsideratën më të lartë, nderuam të gjithë delegatët e asaj kohe të cilët në rrethana jo të lehta me guxim e vizion përfaqësuan aspiratën e kahmotshme të popullit shqiptar për liri dhe përcaktuan bazat e shtetësisë dhe pavarësisë së Kosovës.
Nënkryetarit të Kuvendit të atëhershëm, z. Ilaz Ramajli, në respekt të angazhimit të tij dhe të gjithë delegatëve, kisha nderin t’i ndaj medaljen “ME BESIM NË ZOT, ATDHE E SHTET” për kontribut të jashtëzakonshëm në çështjen kombëtare.
Mirënjohës përjetë për kontributin e tyre të pamohueshëm!
