Drejtori i Përgjithshëm i Policisë së Kosovës, Gazmend Hoxha, ndërsa shpreh urimet për rritën e institucionit të sigurisë së vendit, shprehet se ekspozimi i pajisjeve dhe njësive policore me rastin e 24-vjetorit të themelimit, ka qëlim që qytetarët të ndjehen të sigurt, raporton InLajmi.
Drejtori Hoxha, theksoi se nga policia nuk duhet të frikësohet asnjëri, përjashtuar këtu ata të cilët bien ndesh me ligjin.
“Qëllimi i kësaj ekspozite është që qytetaret tanë të ndjehen të sigurt që këto pajisje janë për të garantuar rend dhe ligj, për t’i ndihmuar ata që të jetojnë qetë dhe sigurt në vendin tonë. Nuk ka nevojë që të frikësohen nga PK-ja askush, përveç atyre që janë në kundërshtim me ligjin. Këto pajisje do të përdoren për ata që bëjnë keq edhe që janë në kundërshtim me ligjin të dalin para drejtësisë dhe ta marrin dënimin e merituar”, u shpreh drejtori Hoxha.
Ai foli edhe për rekrutimin e të rinjve, duke thënë se 500 të rinj do të bëhen pjesë e këtij institucioni.
“Ne veç e kemi pasur një konkurs para një muaj dite është përmbyllur edhe jemi në proces të rekrutimit të këtyre personave që kanë aplikuar. Gjatë këtij viti do të fillojmë edhe gjeneratën e re… do t’i marrim të paktën 400 deri në 500 zyrtarë të rinj dhe rekrutimi do të vazhdoj çdo vjet”, tha Hoxha./InLajmi/