Banka Qendrore e Kosovës ka publikuar statistikat e Bilancit të Pagesave për muajin qershor 2023, derisa bëhet e ditur se vlera e remitancave deri në qershor të këtij viti ka arritur në 635.1 milionë euro, që paraqet rritje prej 14% në krahasim me vitin e kaluar, përcjell InLajmi.
“Remitancat janë kategoria kryesore në kuadër të të ardhurave dytësore, vlera e të cilave deri në qershor 2023 shënoi 635.1 milionë euro, që paraqet rritje prej 14% krahasuar me periudhën e njëjtë të vitit kaluar (555.4 milionë euro ishte deri në qershor 2022)”, bëhet e ditur nga publikimi i statistikave nga BQK-ja.
Sipas publikimit të statistikave nga ana e BQK-së, gjithashtu bëhet e ditur se bilanci tregtar në mallra në kuadër të BP, deri në qershor 2023, kishte deficit në vlerë prej 2.1 miliardë euro, që është deficit më i madh tregtar krahasuar me periudhën e njëjtë të vitit paraprak.
Ndërkaq, sipas statistikave të BQK-së bëhet e ditur se shërbimet deri në qershor 2023 kanë shënuar bilanc pozitiv në vlerë 553.2 milionë euro, që paraqet rritje prej 36% krahasuar me periudhën e njëjtë të vitit 2022 (407.8 milionë euro).
Shpenzimet e udhëtimit të kosovarëve gjatë muajit qershorit sipas statistikave të BQK-së kanë arritur vlerën 58.9 milionë euro, prej të cilave 46% janë shpenzime të bëra në Shqipëri.
Sipas statistikave bëhet e ditur se diaspora këtë vit ka shpenzuar diku 15% më shumë se në periudhën e njëjtë të vitit të kaluar.
“Kategoria kryesore e shërbimeve janë shërbimet e udhëtimi. Vetëm gjatë muajit qershor në Kosovë shërbimet e udhëtimit kanë arritur vlerën 141.3 milionë euro, vitin e kaluar në këtë periudhë kanë qenë 132.3 (7 % më të ulëta se këtë vit). Rreth 90% e shpenzimeve të udhëtimit në Kosovë, përkatësisht 126.6 milionë euro janë shpenzimet e diasporës. Krahasuar me periudhën e njëjtë vitin e kaluar, diaspora këtë vit ka shpenzuar rreth 15% më shumë”, bën të ditur raporti i BQK-së.
Gjithashtu BQK, publikon edhe bilancin e investimeve direkte në Kosovë deri në qershor 2023, ku shihet se në këtë drejtim është shënuar shënoi rezultat prej 271.9 milionë euro.
Kjo tregon se vlera e ID në Kosovë (374.2 milion euro) është më lartë se ID të investuara nga kosovarët jashtë (101.9 milion euro) dhe se investimet direkte arriten vlerën 374.2 milion euro e që paraqet rritje prej 14% krahasuar me periudhën e njëjtë të vitit kaluar (327.3 milionë euro deri në qershor 2022). /InLajmi/
