Kryetari i Partisë Demokratike të Kosovës ka përshëndetur vendimin e Komunës së Prishtinës për subvencionimin e familjeve për regjistrimin e fëmijëve në çerdhet private, ndërsa thekson se përmes kësaj politike do të rritet përfshirja e fëmijëve në edukimin e hershëm, përcjell InLajmi
Krasniqi tha se ndihet krenar për këtë lajm të mirë sidomos tani kur jemi në një periudhë të vështirë të keqmenaxhimit të sektorit të arsimit.
Ndërkohë ka shtuar lideri i PDK-së se për të ndihmuar familjet në edukimin e hershëm është vizioni i subjektit që udhëhqë.
Për më tepër tha ai se asnjë fëmijë nuk duhet të lihet anash.
Postimi i plotë i tij:
Asnjë fëmijë s’duhet të lihet anash!
Nga 70 euro subvencionim për secilën familje të Prishtinës që kanë fëmijë nga 9 muaj deri në 6 vjeç për regjistrim në çerdhet private, të hyrat mujore të të cilave janë nën 500 euro.
Ky është vendimi i Drejtorisë së Arsimit në Komunën e Prishtinës, udhëhequr nga Besianë Musmurati. Një lajm tejet i mirë, për të cilin jemi krenarë të gjithë, posaçërisht në këtë periudhë të vështirë të keqmenaxhimit të sektorit të arsimit nga Qeveria.
Ky është vizioni ynë për të ndihmuar familjet kosovare në edukimin e hershëm të fëmijëve. Përmes kësaj politike, do të rritet përfshirja e fëmijëve në çerdhe dhe edukim të hershëm, do të shtohet pjesëmarrja e grave në tregun e punës, si dhe do të lehtësohet barra financiare për shumë familje të kryeqytetit.
Prishtina, me angazhimin tonë, nuk do të mbetet qyteti i vetëm i cili përfiton nga kjo politikë mbështetëse dhe lehtësuese për familjet kosovare. Në të ardhmen, do të bëjmë përpjekje maksimale që kjo formë të aplikohet edhe në të gjitha komunat e tjera të Kosovës.
E përgëzoj Besianën dhe ekipin e saj për këtë punë të mirë në shërbim të fëmijëve dhe familjeve të Kryeqytetit. Brenda kapaciteteve dhe resurseve, do të ketë vetëm punë të mira dhe konkrete në shërbim të qytetarëve aty ku PDK ka përgjegjësi për të qeverisur!/InLajmi/
