Ministria e Arsimit, Shkencës dhe Teknologjisë (MASHT) ka njoftuar se procesi edukativo-arsimor ka nisur në 658 institucione arsimore, përcjell InLajmi.
Kurse njofton se në 18 institucione tjera mësimi nuk ka filluar, pasi shkollat janë në renovim, ku pritet që në shumicën prej tyre renovimi të përfundoj me 4 shtator.
“Në bazë të informatave të pranuara nga komunat, gjatë ditës së sotme, procesi edukativo-arsimor ka filluar në 658 institucione, ashtu siç është përcaktuar me Udhëzimin Administrativ për Kalendarin e vitit Shkollor 2023-2024. Sipas raportimeve të komunave, procesi mësimor nuk ka filluar në tetëmbëdhjetë (18) institucione arsimore të cilat kanë qenë në proces të renovimit. Në shumicën prej këtyre institucioneve punimet do të përfundojnë deri më 4 shtator dhe do të nis procesi i rregullt mësimor”, thuhet në njoftimin e MASHT-it.
Gjithashtu ministria ka njoftuar se pagesat kanë vazhduar të ekzekutohen edhe sot për ata të cilët kanë aplikuar për subvencionim me tekste shkollore pas 29 gushtit.
Në njoftimin e ministrisë thuhet se deri më tani për subvencionim me tekste shkollore kanë pranuar gjithsej 133.500 aplikime.
Aplikimi për subvencionim me tekste shkollore do të jetë i hapur deri në fund të muajit shtator, siç thonë nga ministria për tu siguruar që asnjë nxënës të mos mbetet pa tekste shkollore./InLajmi/
