Ministri i Shëndetësisë, Arben Vitia ka reaguar lidhur me vdekjen e 35-vjeçares në Malishevë e cila kishte shkuar në një klinikë private për ta hequr një dhëmb e ka mbetur e vdekur në ordinancë, përcjell InLajmi.
Vitia tha se ky rast tragjik shënon një moment vendimtar për ndalimin e pandëshkueshmërisë dhe papërgjegjshmërisë në praktikat e licencimit.
Ai shtoi se ka kërkuar që të evidentojnë çdo shkelje penale ato do të procedohen menjëherë në organet e drejtësisë
Postimi i plotë i tij:
Jemi të gjithë të tronditur dhe të pikëlluar nga vdekja e gruas 35 vjeçare në Malishevë teksa priste të mjekohej.
Ky rast tragjik shënon një moment vendimtar për ndalimin e pandëshkueshmërisë dhe papërgjegjshmërisë në praktikat e licencimit.
Kam kërkuar me gjithë fuqinë që më jep ligji që të kontrollohet çdo hap e veprim i komisionit vlerësues që i paraprinë licencimit. Dhe çdo procedurë. Ndaj përgjegjësve, do të ketë masa.
Në rast të evidentimit të shkeljeve penale ato do të procedohen menjëherë në organet e drejtësisë.
Ky rast nuk do të kalojë as në heshtje dhe as nuk do të tretet në harresë.
Ngushëllimet më të sinqerta familjes që humbi më të dashurën e tyre./InLajmi/
