Drejtori i ATK-së, Ilir Murtezaj në një emisionin ka thënë se Administrata Tatimore e Kosovës është duke vazhduar me reformimin e saj si institucion pothuajse në të gjitha funksionet. Sipas tij, reforma janë duke u bërë në bashkëpunim më ekspertët e Fondit Monetar Ndërkombëtar.
Murtezaj tha se në të kaluarën ATK ka qenë e orientuar nga qasja gjithëpërfshirëse në identifikim të rreziqeve të mospërmbushjes tatimore, ndërsa tani bazuar në rekomandimet e FMN-së ka një qasje sektoriale në identifikim të faktorëve mospërmbushës tatimor.
“Identifikojmë sektorë të caktuara të cilët mund të jenë me rreziqe më të larta në moskryerjen e detyrimeve tatimore. Kemi filluar në vitin 2019 në sektorin e ndërtimtarisë, vitin e kaluar me gastronominë dhe në fund të qershorit kemi miratuar edhe 2 projekte të reja që kanë të bëjnë me trajtimin e personave të pasur dhe tatimin në të ardhurat personale. Këto projekte kanë për qëllim të identifikojnë personat të cilët kanë pasuri dhe për të identifikuar nëse i kanë përmbushur detyrimet tatimore. Në Kosovë ka kategori të ndryshme të individëve që në dukje mund të duken që kanë pasuri të krijuara, por të cilët ndoshta nuk e kanë të dëshmuar mjaftueshëm prejardhjen e pasurisë”, tha ai.
Sipas tij, në këtë rast nuk është ideja që të ndillet frikësim dhe as të konsiderohet si lloj presioni, përkundrazi është aktivitet i ATK-së në trajtim të barabartë të të gjithë akterëve që zhvillojnë aktivite ekonomike në Kosovë.
“Ky rekomandim ka qenë vite më parë nga FMN dhe hap pas hapi ka ardhur deri te miratimi i projektit ku muajin e kaluar është miratuar si tillë dhe tani janë përgatitur edhe planet e veprimit të cilat do të fillojnë së zbatuari ”, ka theksuar ai.
Duke folur lidhur me identifikimin e këtyre personave, Murtezaj theksoi se kanë digjitalizuar shumë procese të punës duke u orientuar edhe në sigurimin e informatave nga agjenci të ndryshme si dhe institucione shtetërore e financiare.
“Grumbullimi i të gjitha të dhënave nga kadastrat, tatimi në pronë, Agjencia për regjistrimin e automjeteve, doganat dhe bankat sjellin një grumbullim të informatave që identifikojnë kategori të njerëzve që dalin me pasuri mbi një milion. Pas kësaj mbetet procesi i verifikimit nga ana e zyrtarëve të ATK-së nëse të njëjtit i kanë dëshmuar të hyrat për të cilat veç i kanë tatimuar. Në rastet kur nuk i kanë të raportuara fare në ATK, atëherë zyrtarët mbeten të verifikojnë se nga çfarë aktiviteti është fituar ajo pasuri” ,tha Murtezaj në emisionin “Info Plus” në RTK.
Sipas tij, projekti do të vazhdojë në kontinuitet dhe pritjet janë që të jepë rezultate. Ai tha se ATK është në rrugë të mirë të identifikimit të invazionit fiskal dhe në planet e veprimit të cilat janë duke u hartuar dhe zbatuar në terren.
