Ministri i Mbrojtjes, Armend Mehaj ka qëndruar për vizitë zyrtare në Turqi ku është takuar me homologun e tij Yaşar Güler, përcjell InLajmi
Mehaj bëri të ditur se gjatë takimit me ministrin turk kanë diskutuar për vazhdimin e bashkëpunimit në fushën e edukimit, trajnimeve dhe shkollimit të ushtrisë së Kosovës.
Tutje u shpreh Mehaj se temë diskutimi ishte edhe anëtarësimi i Kosovës ë Programin për Paqe, dhe anëtarësimin në NATO, ndërsa theksoi se edhe në këtë synim na është premtuar mbështetja nga shteti i Turqisë.
Postimi i plotë i tij:
Në kuadër të vizitës zyrtare në Turqi, së bashku me Gjeneral Dreshaj, kolonel Krasniqi, kolonel Haliti, kolonel Zekaj dhe atasheun tonë të mbrojtjes, kolonel Zejnullahu, kemi zhvilluar takimin me Ministrin e Mbrojtjes së Republikës së Turqisë, z. Yaşar Güler.
Fillimisht urova z. Güler për detyrën e re si Ministër i Mbrojtjes, më pas kemi diskutuar rreth vazhdimit të bashkëpunimit të shkëlqyer që kemi pasur deri më tani me Ministrinë e Mbrojtjes së Republikës së Turqisë si dhe thellimin e këtij bashkëpunimi.
Do të vazhdojmë me bashkëpunimin në fushën e edukimit, trajnimeve dhe shkollimit të ushtrisë sonë. Partneriteti i ndërtuar me mirëbesim nga të dy palët është i fuqishëm dhe i dobishëm për të dy shtetet tona.
Gjithashtu kemi diskuar rreth mbështetjes së Republikës së Kosovës për anëtarësim në Programin për Paqe, për rëndësinë e anëtarësimit tonë në NATO, për misione të përbashkëta dhe marrëveshje tjera që do të hapin fusha të reja të bashkëpunimit. Marrëveshjet shtet me shtet që kemi nënshkruar deri tani, kanë rezultuar të jenë shumë të suksesshme.
Forcimi i ushtrisë sonë për të mbrojtur vendin dhe për t’i shërbyer paqes, është synimi ynë kryesor. /InLajmi/
