Kampi ku janë të vendosura njësitet speciale të Policisë së Kosovës, i njohur deri tani si “Belvedere” në Mitrovicën e Jugut, nga sot do të mbajë emrin e heroit Enver Zymberi, i cili ishte vrarë 12 vjet më parë gjatë një aksioni për vendosjen e rendit dhe ligjit në veri të Kosovës.
Kryeministri Albin Kurti, së bashku me ministrin e Punëve të Brendshme, Xhelal Sveçla, dhe drejtorin e Policisë së Kosovës, Gazmend Hoxha, kanë parakaluar para njësiteve të rreshtuara, para se të zbulojnë pllakën me emrin e Enver Zymberit.
Kurti u zotua se përpjekjet për të sjellë para drejtësisë vrasësit e Zymberit nuk do të ndalen.
Në fjalën e tij në ceremoninë e policëve të rënë në detyrë, Kurti ka kujtuar edhe policët e tjerë të rënë në krye të detyrës.
“Jam shume i nderuar që po kujtojmë 22 zyrtarë policorë që dhanë jetën kundër bandave dhe krimit të organizuar, në operacione në shtrirje të sovranitetit në vend. Sot është përvjetori i vrasjes së Enver Zymberit e ne jemi në vendin ku ai mori rrugën e fundit kur u nis drejt shtrirjes së sovranitetit në vend. Nuk do të ndalemi asnjëherë për të vënë dritë mbi rastin”.
“Me neve është edhe djali i tij, Sokoli”, theksoi Kurti.
“Qoftë i përjetshëm kujtimi për 22 pjesëtarët e Policisë së Kosovës të rënë në krye të detyrës, lavdi Enver Zymberit”.
Kurti tha se Zymberi ishte rritur në një familje patriotike, dhe pasi zhveshi uniformën e UÇK-së, ai e veshi atë të Policisë së Kosovës. “Sakrifica e bijve tuaj janë shembulli më i mirë për gjeneratat e reja. Të jeni përjetësisht që secili djalë e vajzë betohet të ndjekin rrugën që bijve tuaj padrejtësisht u mbyll rruga”.
“Kampi ku do të angazhoheni bartë emrin që nga sot të Enver Zymberit; disa prej jush keni qenë bashkë e jeni të trajnuar së bashku. Vazhdoni drejtësisht për të garantuar rend dhe ligj, vazhdoni të luftoni ndaj grupeve kriminale”, porositi Kurti, policët e rreshtuar.
Ministri i Punëve të Brendshme, Xhelal Sveçla, tha se është nder që sot po nderojnë jetën dhe veprën e 22 zyrtarëve policorë që ranë heroikisht në krye të detyrës. Në vazhdim ai përmendi secilin nga ta me emër e mbiemër.
“Kemi zgjedhur pikërisht këtë ditë që në rënien e Enver Zymerit që të bëjmë zbulimin e pllakës së Enver Zymberit. Kjo qendër deri më sot është quajtur Belvedere, sot e tutje do të quhet ‘Enver Zymberi’”, tha Sveçla, shkruan EO.
Edhe Sveçla kërkoi nga organet e drejtësisë që kryerësit e vrasjes së policit, Enver Zymberi, t’i sjellin para drejtësisë dhe ata të marrin dënimin e merituar.
