Projekti CBCEcoKid i cili implementohet nga Komuna e Ferizajt ka mbajtur një aktivitet me fëmijët e kësaj komune, ku përmes shembujve, video prezantimeve dhe vizatimeve u synua që fëmijët ta kuptojnë nevojën për të ndryshuar sjelljet e tyre me qëllim që ta ruajnë dhe kursejnë energjinë elektrike, përcjell InLajmi.
Pjesë e këtij aktiviteti ishin 25 fëmijë parashkollorë të çerdhes ‘Ardhmëria Jonë’ në Ferizaj.
Ndryshe ky projekt është i financuar nga Bashkimi Evropian në kuadër të programit për bashkëpunim ndërkufitar midis Kosovës dhe Maqedonisë së Veriut.
Njoftimi i plotë nga Komuna e Ferizajt:
Edukimi i gjeneratave fillon nga fëmijëria e hershme
Pajisjet elektronike dhe celularët, televizorët, kompjuterët dhe video lojërat janë bërë pjesë përbërëse të shtëpive tona, veçanërisht në duart e fëmijëve. Aktivitetet e organizuara nga projekti CBCEcoKid, si pjesë e fushatës vetëdijesuese në lidhje me ‘Efiçiencën e Energjisë’, targetuan edhe fëmijët parashkollorë të çerdhes ‘Ardhmëria Jonë’ në Ferizaj.
25 prej tyre morën pjesë në ligjëratën e dizajnuar enkas për ta, ku përmes shembujve, video prezantimeve dhe vizatimeve u synua që ata ta kuptojnë nevojën për të ndryshuar sjelljet e tyre me qëllim që ta ruajnë dhe kursejnë energjinë elektrike.
Mësimi i fëmijëve parashkollorë për kursimin e energjisë nuk ishte vetëm një mënyrë krijuese e stafit të projektit CBCEcoKid për të kaluar kohë me ta, por ndihmon sjelljen më efikase të fëmijëve të Ferizajt duke rrënjosur zakone të mira që, më vonë, do t’i sjellin dobi shoqërisë në përgjithësi.
Projekti CBCEcoKid implementohet nga komuna e Ferizajt, në partneritet me komunën e Çairit dhe OJQ ‘Business Support Center Kosova – BSCK’ dhe është i financuar nga Bashkimi Evropian në kuadër të programit për bashkëpunim ndërkufitar midis Kosovës dhe Maqedonisë së Veriut. /InLajmi/
