Makina të djegura, kafshë të ngordhura e sipërfaqe të tëra të shkretuara.
Kjo është ajo që ka lënë pas zjarri që ka përfshirë prej 4 ditësh ishullin e Rodhosit në Greqi dhe që ka djegur dhjetëra hektarë me pyje dhe kullota.
Flakët vijuan edhe këtë të dielë, teksa shtëllunga të mëdha tymi mbulonin pjesë të tëra të ishullit duke zbritur deri në plazhe.
Brigada e zjarrfikësve tha se 19.000 njerëz, kryesisht turistë, u zhvendosën nga shtëpitë dhe hotelet, duke e quajtur atë transportin më të madh të sigurt të banorëve dhe turistëve që ka kryer ndonjëherë Greqia.
Ato u vendosën në shkolla dhe strehimore, ndërsa një pjesë e tyre ndërprenë pushimet për t’u kthyer në shtëpitë e tyre, shkruan Klan Tv.
Mbrojtja Civile ka paralajmëruar për një rrezik shumë të lartë të zjarreve të dielën në pothuajse gjysmën e Greqisë, ku temperaturat pritej të arrinin 45 gradë Celsius.
