Nëse debutimi i Lionel Messit në Amerikë me fanellën e Inter Miami do të ishte një skenar filmi, atëherë nuk do të kishte një skenar më perfekt se ajo që ndodhi me argjentinasin në sfidën ndaj Cruz Azul.
Ndeshjen në kuadër të Kupës së Ligës ndaj skuadrës meksikane, Messi e nisi në stol për t’u aktivizuar në minutën e 54. Rezultati ishte 1-0 në favorin e skuadrës së argjentinasit, me realizator Robert Taylor në minutën e 44 të ndeshjes.
Mirëpo në të 65-tën, Inter Miami pësoi golin e barazimit. Uriel Antuna ishte shënuesi për miqtë që baraspeshoi shifrat.
Por me pas të gjithë sytë e të pranishmëve ishin pikërisht mbi Kampionin e Botës i cili duhej të “shpikte” një magji si ato që ka bërë gjatë gjithë karrierës.
Dhe, 36-vjeçari nuk i zhgënjeu pritshmëritë e mbi 20.000 të pranishmëve në stadium teksa në të 94-tën mori përsipër ekzekutimin e një goditje dënimi në afërsi të zonës kundërshtare.
Topi në trekëndësh me portierin që nuk mund të bënte asgjë dhe stadiumi në festë. Ishte perla e parë e Messit në Amerikë, një gol deçiziv që i dhuroi fitoren dhe 3 pikët Inter Miamit në fazën e grupeve të Kupës së Ligës, shkruan Teve1.
Padyshim debutimi i ëndrrave për “pleshtin” që në fund mori edhe përgëzimin e David Beckham teksa në Amerikë duhet të mësohen me spektaklin pasi ishte pikërisht kjo arsye pse e transferuan një si Lionel Messi.
