Zëvendësministri i Punëve të Jashtme dhe Diasporës, Kreshnik Ahmeti, ka folur për procesin e anëtarësimit të Kosovës në Këshillin e Evropës.
Ahmeti, thotë se fillimisht duhet të finalizohet raporti vendimtar nga raportuesja për Kosovën në Asamblenë Parlamentare të Këshillit të Evropës, Theodora Bakoyannis. Dhe më pas ky raport shkon si opinion joobligativ te Komiteti i Ministrave në nivel të ministrave.
“Duhet të finalizohen raportet, kjo është sepse kur të finalizohen raporti përfundimtar, raporti nga zonja Bakoyannis ajo do ta ketë raportin vendimtar që vihet në votim, atëherë duhet sesioni i Asamblesë Parlamentare të Këshillit të Evropës që do ta votojë e kur kjo të votohet suksesshëm shkon si opinion joobligativ te Komiteti i Ministrave në nivel të ministrave, ku ministrat takohen një herë në vit, në muajin maj. Pra, këto janë pikat orientuese për çështjen e procesit të anëtarësimit në Këshillin e Evropës”, tha ai
Ahmeti, beson që në muajin maj të vitit të ardhshëm raporti vendimtar do të jetë para ministrave.
“Unë besoj thellësisht që në rast që procesi do të bazohet në meritokraci dhe nuk do të ndërlidhet e kushtëzohet me procese të tjera kjo është shumë e mundshme. Ajo çfarë kemi parë gjatë fazës së parë, ka pasur tendenca që të ndërlidhet kjo, por në fund kemi arritur suksesshëm që më 24 prill në bashkëpunim me partnerët tanë ta shtyjmë tutje dhe ta kemi një votim të suksesshëm”, tha zyrtari qeveritar.
Tutje, ai tha se angazhimi i qeverisë është që sa më shpejtë Kosova të bëhet pjesë e Këshillit të Evropës.
“Mbledhjet e sesionit të Asamblesë Parlamentare tri të ardhshmet do të jenë në tetor, janar dhe në prill, ku në njërën prej tyre do të duhej të votohej raporti përfundimtar si opinion, me rekomandime eventuale, ndërsa ministerialet prej nga do të duhej të vinte ftesa për t’u bërë anëtarë mbahen një herë në vit, në muajin maj. Angazhimi jonë është që kjo të bëhet sa më shpejtë”, shtoi ai.
Kosova në muajin maj të vitit 2022 ka aplikuar për anëtarësim në Këshillin e Evropës. Aplikimin në selinë e Këshillit të Evropës, në Strasburg, e ka bërë ministrja e Punëve të Jashtme dhe Diasporës e Kosovës, Donika Gërvalla, shkruan Teve1
Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës. Këshilli mbron lirinë e shprehjes dhe të mediave, barazinë dhe minoritetet në vendet anëtare.
