Kryetari i AAK-së, Ramush Haradinaj, edhe njëherë u ka bërë thirrje partive opozitare ta mbështesin mocionin e mosbesimit të iniciuar nga Aleanca për Ardhmërinë e Kosovës.
Haradinaj në kërkesën e tij drejtuar partive opozitare, ka thënë se nëse të njëjtat janë të sinqerta në qëndrimin e tyre se kjo Qeveri duhet të ndalet, atëherë duhet ta mbështesin një mocion të tillë.
Pas kërkesës së Haradinajt për të mbështetur mocionin ka ardhur një reagim nga Partia Demokratike e Kosovës.
Deputeti i kësaj partie Hajdar Beqa, tha se qëndrimi i PDK-së është i qartë, vendi duhet të shkojë sa më parë në zgjedhje.
Beqa tha se si opozitë nuk i kanë numrat për rrëzimin e qeverisë Kurti, por deklaroi se janë duke punuar për largimin e saj nga pushteti.“
Qëndrimi i Partisë Demokratike është i qartë, ne mendojmë se sa më shpejt shkojmë në zgjedhje është më mirë për vendin, Kosovën dhe ndalet dëmi që po ia bën kjo Qeveri vendit në të gjitha sferat, edhe në aspektin diplomatik edhe në aspektin ekonomik, të sigurisë por në të njëjtën kohë edhe në aspektin e dukurive negative. Siç e keni pa që ka lulzu korrupsioni tek zyrtarët e lartë të Lëvizjes Vetëvednosje. Sa i përket formës sesi me shku në zgjedhje ne si opozitë ende nuk i kemi numrat e mjaftueshëm për ta rrëzuar qeverinë. Ne jemi duke punuar dhe do të punojmë natë e ditë që kjo Qeveri të shkojë sa më shpejt dhe të vijë një qeveri e cila është në harmoni me kërkesat e qytetarëve dhe punon për interesat e vendit. PDK-ja ka qëndrimin e vet publik”, tha Beqa
Edhe deputetja e LDK-së, Rrezarta Krasniqi, deklaroi se opozita nuk i ka votat për mocionin e mos-besimit, shkruan Gazeta Blic
Krasniqi tha se LDK-ja ka zgjedhur një rrugë të re, duke iu referuar takimeve me shoqërinë civilie, dhe se të njëjtit nuk kanë marrë vendim të ri që nga mbledhja e fundit e Kryesisë.
“Na edhe më herët jemi deklaruar, kemi zgjedhur një rrugë të re. S’kemi vota për mocion momentalisht. Nuk kemi marrë vendim tjetër pas mbledhjes së Kryesisë, kur të mbajmë mbledhje marrim vendime” tha shkurt Krasniqi
