Ministri i Financave, Hekuran Murati, ka reaguar pasi kryetari i grupit parlamentar të AAK-së, Besnik Tahiri, e dërgoi në Gjykatën Kushtetuese, Ligjin për Pagën Minimale, përcjell InLajmi
Murati tha se ata që për më shumë se një dekadë e lanë pagën minimale në 170 euro, sot e dërguan Ligjin për Pagën Minimale në Gjykatën Kushtetuese.
Tutje, ai tha se opozita po tenton që me çdo kusht ta bllokojë këtë ligj, teksa pyeti “pse vallë kanë kaq shumë urrejtje?!”.
Postimi i plotë i tij:
80,985 persona paguhen më pak se 264 euro në muaj.
Janë punëtorët e mirëmbajtjes, sigurimit fizik, arkëtarë, ndërtimtarë e shumë të tjerë që me padurim presin rritjen e pagës minimale.
Por, ata që për më shumë se një dekadë e lanë pagën minimale në 130/170 euro, sot e paskan dërguar në Gjykatë Kushtetuese Ligjin për Pagën Minimale, për ta kundërshtuar rritjen që ka propozuar Qeveria Kurti.
Pra lëre që ata vetë nuk e rritën pagën minimale sa ishin në pushtet, por tash kur ne e rritëm, po tentojnë që me çdo kusht ta bllokojnë.
Pse vallë kanë kaq shumë urrejtje?! /InLajmi/
