Kontestimi i PDK-së në Gjykatë Kushtetuese i seancës plenare, ku pati edhe përleshje fizike po vlerësohet e bazuar nga njohës të rrethanave kushtetuese. Ndërkohë, juristë dhe përfaqësues të organizatave që monitorojnë punën e Kuvendit, po vlerësojnë se seanca e 13 korrikut është përcjell me shumë shkelje të rregullores së Kuvendit nga kryeparlamentari, Glauk Konjufca.
Partia Demokratike e Kosovës e ka çuar në Gjykatë Kushtetuese, vendimin e kryetarit të Kuvendit të Kosovës për caktimin e seancës plenare të javës së kaluar. E këtë kontestim të PDK-së, njohës të rrethanave kushtetuese po e vlerësojnë të bazuar dhe si një e drejtë të cilën duhet ta shfrytëzojnë deputetët e Kuvendit. Hulumtuesi i lartë nga Instituti i Kosovës për Drejtësi, i cili monitoron punën e Kuvendit, Naim Jakaj, i tha Radio Kosovës se mbarëvajtja e kësaj seance nuk ka qenë e rregullt pasi ka pasur shumë shkelje të udhëheqjes nga ana e kryetarit të Kuvendit.
“Mbarëvajtja e seancës nuk ka qenë e rregullt, për arsye se nuk është respektuar rregullorja sa i përket kryesimit nga ana e kryetarit të Kuvendit. Kryetari i Kuvendit, nuk ia ka tërhequr masën, vërejtën apo nuk ka shqiptuar ndonjë vendim për largim nga seanca për ata që kanë prishur rendin. Shkelja tjetër që është evidentuar ka qenë në raport me thirrjen e Policisë nga kryetari për të hyrë në seance, edhe përkundër që ajo nuk është e lejueshme pa u ndërmarrë hapat e tjerë siç e thotë rregullorja e Kuvendit”, tha ai.
Po ashtu, Jakaj tha se në atë seancë janë miratuar shumë ligje të rëndësishme siç është ai i pagës minimale, ndërkohë nuk ka pasur një respektim të drejtë të rregullores nga ana e kryetarit të Kuvendit.
“Në këtë seance behët fjalë për miratimin e Ligjeve të rëndësishme siç është ai i Pagës Minimale, janë disa ligje nga fusha e drejtësisë, zgjedhja e Guvernatorit. Behët fjalë për dhjetëra pika shumë të rëndësishme, e ndërkohë nuk kemi pas respektim të saktë, të drejtë dhe të qartë të rregullores nga ana e kryesuesit të Kuvendit”, tha Jakaj.
E, njohësi i çështjeve kushtetuese, Kadri Kryeziu, i tha Radio Kosovës së nëse deputetët vlerësojnë se gjatë seancës ka pasur shkelje të rregullores, ata kanë të drejtë t’i drejtohen Gjykatës.
“Deputetet kanë të drejtë t’i drejtohen Gjykatës Kushtetuese pasi është e garantuar më Kushtetutë, nëse ata e konsiderojnë se procedurat në Parlament nuk kanë shkuar në bazë të rregullores së Kuvendit. Kjo duhet të përmbushet më dokumentacion, me fakte, e pastaj Kolegji Kushtetues i Gjyqtarëve vendos për këtë çështje”, tha Kryeziu , shkruan RTK.
Drejtues të PDK-së, kanë bërë të ditur se e kanë çuar në Gjykatë Kushtetuese vendimin e kryetari të Kuvendit të Kosovës për caktimin e seancës plenare të javës së kaluar, ku kanë kërkuar vlerësimin e kushtetutshmërisë së vendimit për caktimin e seancës së 13 korrikut, me kërkesën që një vendim i tillë të anulohet në tërësi. Sipas tyre, seanca është caktuar në kundërshtim me Kushtetutën e Kosovës dhe Rregulloren e Punës së Kuvendit dhe si e tillë duhet të anulohet.
