Qendra Klinike Universitare e Kosovës (QKUK) aktualisht është duke operuar me 45 anesteziologë.
Kështu ka bërë të ditur, drejtori i Klinikës së Anesteziologjisë, Gazmend Spahija.
“Në klinikën e Anestezionit dhe Mjekimit Intensiv janë të punësuar momentalisht 45 anesteziologë”, tha ai.
Spahija: Klinikës pritet t’i shtohen 4 anesteziologë, është hapur konkursi
Drejtori i Anesteziologjisë, Gazmend Spahija, tha se ka vullnet për ta rritur numrin e anesteziologëve nëpër klinika, por që momentalisht nuk ka të papunë në këtë drejtim.
Ai ka treguar se është hapur konkursi për 4 anesteziologë të interesuar të punojnë në këtë Klinikë.
“Javë më parë është hapur konkursi për 4 anesteziologë të cilët janë të interesuar të punojnë në Klinikën e Anestezionit. Për momentin në Republikën e Kosovës nuk ka anesteziologë të papunë, se vullneti i Ministrit është që të gjithë anesteziologët e interesuar të punësohen”, tha ai.
Spahija thotë se numri i vogël i anesteziologëve ka shtuar listat e pritjeve të pacientëve.
Sipas tij, është e pamundur të plotësohet kërkesa e të gjitha klinikave, në kohën kur po shtohen edhe shërbime tjera brenda QKUK-së.
“Me këtë numër të vogël të anesteziologëve është e pamundur të plotësohen kërkesat e të gjitha klinikave kirurgjike dhe jokirurgjike, duke ditur faktin që shërbimet shëndetësore në QKUK vazhdimisht po shtohen”, deklaroi ai.
Spahija thotë se edhe Ministria e Shëndetësisë është në dijeni për këtë mungesë, dhe ka reflektuar duke e hapur konkursin, por që fatkeqësisht numri është i vogël.
“Ministri i Shëndetësisë është i informuar me gjendjen në Klinikën e Anestezionit dhe në momentin kur është shfaq interesimi i anesteziologëve për punësim në QKUK, menjëherë ka reflektuar me hapjen e konkursit, fatkeqësisht edhe ky numër është i vogël”, deklaroi ai.
Drejtori i Anesteziologjisë: Vitin e kaluar lëshuan punën 10 anesteziolog, këtë vit asnjë.
Drejtori i Klinikës së Anesteziologjisë, Gazmend Spahija, ka bërë të ditur se gjatë këtyre 6 muajve nuk ka lëshuar asnjë anesteziologë vendin e punës në QKUK, por ka përmendur statistikat se vitin e kaluar vendin e punës e braktisën 10 anesteziolog.
“Vitin e kaluar e kanë lëshuar punën 10 anesteziolog, në 6 muajt e parë të këtij viti nuk e ka lëshuar punën asnjë anesteziolog”, u shpreh ai, për Front Online.
Ikja e mjekëve dhe kuadrove të tjerë në shëndetësi po konsiderohet si shqetësuese.
Të njëjtit po detyrohen që të lëshojnë vendin e tyre të punës për shkak të siç po thonë kushteve jo të mira.
