Me shtimin e temperaturave, qytetarëve në Kosovë u është kërkuar të kenë kujdes nga kafshimi i gjarpërinjve.
Nga Zyra për Informim e Shërbimit Spitalor Klinik Universitar kanë njoftuar, se janë të furnizuar me serum kundër kafshimit nga gjarpërinjtë.
Megjithatë, ata kërkojnë nga qytetarët, që të kenë kujdes kudo që hasin në gjarpërinj.
Mustafë Ramadani tash e mbi 40 vjet del për shëtitje në Gërmi. Ai jo rrallëherë has në gjarpërinj, edhe pse thotë se nuk ua ka frikën.
“Ka gjarpërinj por jo sulmues. Ata vetëm mbrohen. Duhet informim se si të sillemi ne mal. Ne mal duhet të kemi kujdes se ku e vendos këmbën, dorën”, thotë qytetari Mustafë Ramadani.
Ai thotë se nuk duhet të mungojë as serumi kundër tyre.
Njëjtë mendon edhe një tjetër qytetar që kishte dal për ecje në parkun e Gërmisë, shkruan RTK
“Medikamentet janë shumë të nevojshme dhe nuk është deshtë me mungu”, thotë qytetari Shefqet Islami.
