Asociacioni i Gazetarëve të Kosovës kanë reaguar ndaj deklarimit të Ministrit të Punëve të Brendshme Xhelal Sveçla, i cili ka përdorur sipas AGK-së “gjuhë të rrezikshme dhe të papranueshme” ndaj mediave dhe gazetarëve, përcjell InLajmi.
Sveçla ka pretenduar se incizimet e shefes së Grupit Parlamentar të LVV-së me ish-deputetin e Listës Serbe, Slavko Simiq u janë dhënë mediave nga presidenti serb, Aleksandar Vuçiq.
Ai tutje ka akuzuar gazetarët Berat Buzhala dhe Vehbi Kajtazi për organizimin e protestës së veteranëve të UÇK-së.
AGK ka konsideruar se gjuha e tillë rrezikon sigurinë e gazetarëve të përmendur dhe është pjesë e tentimit të vazhdueshëm të pushtetit për të frikësuar mediet.
Njoftimi i plotë nga AGK:
Gjuhë e rrezikshme e Ministrit Sveçla ndaj gazetarëve
Asociacioni i Gazetarëve të Kosovës e ka parë me shqetësim një postim të Ministrit të Brendshëm, Xhelal Sveçla, në të cilin ai përdorë gjuhë të rrezikshme dhe të papranueshme në drejtim të medieve dhe gazetarëve.
Ministri Sveçla insinuon se audio-incizimet e Shefes së Grupit Parlamentar të partisë së tij, Mimoza Kusari Lila me ish-deputetin e Srpskas, Simiq u janë dhënë medieve kosovare nga presidenti serb, Vuçiq.
Ministri gjithashtu akuzon gazetarët Berat Buzhala dhe Vehbi Kajtazi për organizimin e protestës së veteranëve.
Gjuha e tillë rrezikon sigurinë e gazetarëve të përmendur dhe është pjesë e tentimit të vazhdueshëm të pushtetit për të frikësuar mediet/InLajmi/
