Kryetari i Lidhjes Demokratike të Kosovës Lumir Abdixhiku, ka reaguar duke e quajtur deklaratën e Ministrit të Punëve të Brendshme Xhelal Sveçla, të pamatur, nxitëse e ofenduese, përcjell InLajmi.
Abdixhiku tha se të injorosh komunikimin e shefes së partisë me një terrorist, e të ndërtosh gjuhë nxitëse e përplasëse me plot imagjinatë është maskaradë, duke thënë se kjo gjuhë e dhënë tani kërkon përplasje, kërkon dhunë e krizë.
Ai shtoi duke thënë na duhen mendje të urta, që afrojnë e s’ndajnë, na duhen politikanë që distancohen nga një mendësi primitive e tillë, e mendësia e tillë meriton veçse shkarkim.
Tutje kreu i LDK-së tha se Kosova meriton më mirë. Kosova duhet ta bëjë një rrugë të re. Kjo gjuhë, dhuna e nxitja e saj, nuk kanë vend.
Postimi i plotë i tij:
Deklaratë e pamatur, nxitëse e ofenduese e Ministrit të Punëve të Brendshme. Etiketimi i pabazë i gazetarëve e ofendimi i turpshëm i luftëtarëve edhe nëse s’pajtohemi me ta është nivel i ri i ulët i politikëbërjes në Republikë.
Të injorosh komunikimin e shefes së partisë me një terrorist, e të ndërtosh gjuhë nxitëse e përplasëse me plot imagjinatë është maskaradë.
Kjo gjuhë, e dhënë tani, kërkon përplasje. Kërkon dhunë e kërkon krizë. Duket se mendja e pushtetit është mu në dhunë e krizë.
Sot, megjithatë na duhet maturi. Na duhen mendje të urta, që afrojnë e s’ndajnë. Sot, mbi të gjitha na duhen politikanë që distancohen nga një mendësi primitive e tillë. E mendësia e tillë meriton veçse shkarkim. Asgjë më pak.
Kosova meriton më mirë.
Kosova duhet ta bëjë një rrugë të re. Kjo gjuhë, dhuna e nxitja e saj, nuk kanë vend/InLajmi/
