Lidhja Demokratike e Kosovës ka reaguar pas dhunës në Kuvendin e Kosovës këtë të enjte në seancë, duke thënë se pamje të tilla s’e kanë e s’e kanë pasur kurrë vendin në Kuvend, të cilat i quajtën pamje të shëmtuara, përcjell InLajmi.
Sipas LDK-së, kjo ditë ishte e rëndë në historinë parlamentare të Republikës, duke shtuar se instaluesit e dhunës në kuvend, nuk kanë të drejtë moralizuese sot.
Tutje, në njoftim thuhet se kjo parti do të vazhdojë të mbrojë dhe ushtrojë vlerat bazike demokratike në çdo sjellje të saj, brenda e jashtë sallës së kuvendit, dhe se këtë sjellje të papërgjegjshme, ndarëse e përplasëse nuk guxojmë ta ushqejmë njësoj
Njoftimi i plotë nga LDK:
Pamjet e shëmtuara të dhunës nuk e kanë vendin në Kuvendin e Republikës. Nuk e kanë pasur asnjëherë as në të shkuarën as tani. Sot, ishte një ditë tjetër e rëndë në historinë parlamentare të Republikës.
Instaluesit e dhunës në Kuvendin e Kosovës nuk kanë të drejtë moralizuese sot. Ata kanë ushqyer polarizimin e skajshëm shoqëror, kanë ushqyer gjuhën e urrejtjes, ndarjes e përplasjes në çdo sjellje e veprim të tyre; e bëjnë dhe sot.
Këtë sjellje të papërgjegjshme, ndarëse e përplasëse nuk guxojmë ta ushqejmë njësoj.
LDK do të vazhdojë, si gjithherë, të mbrojë dhe ushtrojë vlerat bazike demokratike e shtetare në çdo sjellje të saj, brenda sallës së Kuvendit të Republikës dhe jashta saj/InLajmi/
