Kryetari i Kuvendit të Kosovës ka marrë fjalën pas rinisjes së seancës së Kuvendit të Kosovës, pas incidentit dhe përplasjes fizike në mes të deputetëve të PDK-së dhe kabinetit të kryeministrit Albin Kurti, përcjell InLajmi
Konjufca ka thënë se ka biseduar me kryeministrin Albin Kurti dhe ai është pajtuar të heq dorë nga fjala e tij dhe që të vazhdohet me pyetjet parlamentare, si mënyrë për ta tejkaluar situatën pas përplasjes fizike në Kuvendin e Kosovës.
“E dimë që jemi shtet i ri e që Kuvendi dhe institucionet kanë përjetuar peripeci të llojllojshme, por deri ditën e sotme e kemi pas një imuniteti të mirë që është vlerësuar nga bota demokratike, por ky imunitet që iu kemi rezistu akteve të tilla që nga viti 2001. Është mungesa e përleshjeve fizike. Kemi pas probleme të natyrave tjera, por jo të kuptimit fizik. Me ia mësy njeri-tjetrit, drejt ftyrave drejt kokës. Këtë s’ja dëshirojmë askujt. Kjo është një sjellje që do të gjykohet nga qytetarët dhe s’do të doja të përsëritej në këtë Kuvend”, tha ai.
Më tej ai kërkoi që deputetët të hapin një kapitull të ri dhe se deputetët të mos bëhen përgjegjës për diçka që s’do të donim ta shihnim vendin tonë në atë gjendje
“Ju kisha lut si kryetar për këtë kapitull të ri që duhet ta hapim, pas kësaj dite të vështirë, pas atyre veprimeve të papranueshme që i pamë. Nëse e kam këtë mirëkuptim prej të gjithë deputetëve, mirë, nëse jo, do të ishte një ogur i zi për Kosovën, që mendoj se na çon në faza të paparashikueshme, edhe për Kosovën edhe për qytetarët. Të mos bëhemi përgjegjës për diçka që s’do të donim ta shihnim vendin tonë në atë gjendje”, ka thënë Konjufca. /InLajmi/
