Kryeministri Albin Kurti, në seancën e Kuvendit, mori fjalën duke sqaruar marrëveshjen e arritur në Bratisllavë të nënshkruar nga zëvendëskryeministri Besnik Bislimi me të dërguarin e BE-së për dialogun, Miroslav Lajçak, raporton InLajmi.
Kryeministri Kurti para deputetëve shpalosi detaje nga kjo marrëveshje, ndërsa theksoi se atje nuk është arritur një marrëveshje për normalizim të marrëdhënieve mes Kosovës dhe Serbisë.
“Marrëveshja që u bë nuk është marrëveshje për normalizim, është marrëveshje për deeskalim në të cilën ne natyrisht nuk heqim dorë nga zbatimi i ligjit, nga sundimi i ligjit, nga luftimi i krimit të korrupsionit e kontrabandës”, u shpreh kryeministri, duke shtuar se kjo ishte shprehje e gatishërisë së Kosovës për paqe të qëndrueshme.
“Por në të njëjtën kohë edhe e kemi shfaqur ndjeshmërinë për rëndësinë e paqes së qëndrueshme, të stabilitetit afatgjatë të sigurisë për të gjithë, e cila nënkupton që të kemi ndjeshmëri që në këto dy javët e fundit nuk ka pasur as protesta të dhunshme, as incidente, as sulme në veri të Kosovës”, tha Kurti.
Derisa Kurti ishte duke mbajtur fjalim në Kuvend, ndodhi një përplasje mes deputetëve të pozitës dhe opozitës./InLajmi/
