Të martë është mbajtur testi i Arritshmërisë, i cili ngjalli reagime të shumta, ndërsa njëri nga ata që reaguan është edhe Shefi i Grupit Parlamentar të Aleancës për Ardhmërinë e Kosovës Besnik Tahiri, i cili tha se Testi i Maturës po kthehet në test të marrëzisë, përcjell InLajmi.
Tahiri e quajti test të marrëzisë për shkak të ankesave për manipulim e keqmenaxhim e padrejtësi ndaj nxënësve.
Ai për këtë adresoi kritika tek Ministria e Arsimit që sipas Tahirit mbajtja e testit ishte një proces i mbikëqyrur në mënyrë joprofesionale e kaotike me mungesë sensibilizimi për rëndësinë e testit.
Ndërsa flet për parregullsitë e testit si rezultat i “dështimit: të MASHT-it, Tahiri tha se Zyra e Grupit Parlamentar është e hapur për çfarëdo komunikimi me prindër të cilët janë të pakënaqur dhe kanë evidencë për manipulime, keqmenaxhim dhe padrejtësi që u janë bërë nxënësve.
Shefi i GP të AAK-së paralajmëroi se pas daljes së rezultateve do të ftojnë në interpelancë ministren e MASHT-it por edhe do të kërkojnë votim të një Rezolute për suspendimin e këtij procesi.
Postimi i plotë i tij:
Testi i arritshmërisë po kthehet në test të marrëzisë!
Dje ka përfunduar Testi i Arritshmërisë dhe Maturës, një proces i mbikëqyrur nga MASHT në mënyrë joprofesionale dhe kaotike, marrëzi.
Pse?
Për muaj me radhë, nuk pati asnjë informim nga MASHT, se cila është rëndësia e Testit të arritshmërisë dhe maturës, sikurse nuk kishte as informim as sensibilizim zero. Gjithçka rutinë.
Përgjatë gjithë kohës nuk pati asnjë debat rreth asaj se si mund të përgatiteshin më mirë nxënësit, dhe çfarë mund të bënin mësimdhënësit dhe prindërit në këtë drejtim. Pra as informim as përfshirje, sikur dështimi dhe mos arritshmëria e nxënësve të ishte qëllim.
Është e papranushme tendenca e MASHT-it për të shpërndarë përgjegjësinë, ku s’i kursyen as nxënësit, për një proces për të cilin nuk siguroi as menaxhim, as mbikëqyrje, as informim, as cilësi. Në fakt, nxënësit janë viktima të një menaxhimi të dobët.
Grupi ynë parlamentar, po pret rezultatet, dhe deri atëherë do t’i bëjë disa veprime:
Nga e sot, Zyra e Grupit Parlamentar është e hapur për çfarëdo komunikimi me prindër, të cilët janë të pakënaqur dhe kanë evidencë për manipulime, keqmenaxhim dhe padrejtësi që u janë bërë nxënësve.
Po ashtu, ankesat mund të drejtohen në email-in tonë: Grupiaak@assembly-kosova.org ose telefon: 03820010115.
Pas daljes së rezultateve dhe me evidentimin e menaxhimit të keq, do të bëjmë 2 veprime:
- Do të ftojmë në interpelancë ministren e MASHT-it;
- Do të kërkojmë votim të një Rezolute për suspendimin e këtij procesi, gjithmonë në bazë të evidences/InLajmi/
