Ministri i Ambientit e Planifikimit Hapësinor dhe Infrastrukturës Liburn Aliu, në konferencën e mbajtur për media pas mbledhjes së Qeverisë, ka folur rreth Ligjit për legalizimin e ndërtimeve, si dhe atij për ndryshime klimatike të cilin e cilësoi shumë të rëndësishëm, raporton InLajmi.
Aliu tha se mos-kalimi i Ligjit për legalizimin e ndërtimeve, në mbledhjen e Kryesisë së Kuvendit, mund të sjell dëme të mëdha për vendin.
“Miratuam Ligjin për Ndryshime Klimatike, do të kemi ndryshim të madh në mjedis. Është ligj i rëndësishëm. Dua të jua përkujtoj se ndikimet e ndryshimeve klimatike janë të vërejtshme, që kanë të bëjnë me thatësira, që kërkojnë projekte në adaptimin e këtyre rrethanave të reja që po hyjmë”, tha ministri.
Ai tutje u shpreh se vazhdimisht po bëjnë përpjekje që Kosova të jetë në konventën e Kombeve të Bashkuara dhe të ketë qasje në fondet e BE-së.
“Krahas këtij ligji jemi duke bërë edhe strategji të ndryshme. Vendi ynë është në gjendje kritike sa i përket ujit dhe këto projekte do të na mundësojnë që të adaptohemi me këtë. Në konventën e Kombeve të Bashkuara, Kosova pothuajse nuk ekziston fare. Lobojmë që të kemi qasje në fondet e BE-së, nga ndryshimet klimatike ndikojnë edhe ndikohemi”, tha ai.
Aliu tha se nga 350.000 ndërtime pa leje janë legalizuar vetëm 15.000.
Ai theksoi se bëhet fjalë për vazhdimin e afatit për qytetarët për legalizimin e ndërtimeve.
“Trajtimi i ndërtimeve pa leje ka qenë dje në rend të ditës dhe nuk ka kaluar. Është bërë dëm i madh. Është e vërtetë që numrat kanë qenë por, disa deputetë të Vetëvendosjes nuk e kanë votuar. Një numër i madh i qytetarëve po presin, por shpresoj që në seancën e radhës të kemi këtë mundësi”, tha Aliu.
