Presidentja e Kosovës Vjosa Osmani, ka kujtuar 28 vjetorin e masakrës së Srebrenicës e cila ndodhi në Bosnje e Hercegovinë nga regjimi gjenocidal i Millosheviqit, përcjell InLajmi.
Osmani tha se në këtë masakër u shuan 8.372 jetë të pafajshme, ndërsa sot e kësaj dite nëna të Srebrenicës ende kërkojnë drejtësi për gjenocidin i cili nuk do të harrohet kurrë.
Ajo tutje tha se ky regjim edhe sot mohon gjenocidin në Srebrenicë e kudo në Bosnjë e Hercegovinë, sikurse e mohon edhe gjenocidin në Kosovë, ku i njëjti regjim që avokonte për gjenocidin atëherë e i sulmon Kosovën e Bosnje-Hercegovinën edhe sot.
Presidentja tutje shtoi se mohuesit e gjenocidit nuk mund të shndërrohen asnjëherë në faktorë të paqes.
Postimi i plotë i saj:
8.372 jetë të pafajshme!
8.372 nëna të Srebrenicës që edhe sot kërkojnë drejtësi për bijtë e tyre!
Një gjenocid që nuk do të harrohet kurrë.
Një regjim, që edhe sot e mohon gjenocidin në Srebrenicë e kudo në Bosnjë e Hercegovinë, sikurse e mohon edhe gjenocidin në Kosovë. Po i njëjti regjim që avokonte për gjenocidin atëherë e që i sulmon Kosovën e Bosnje-Hercegovinën edhe sot.
Mohuesit e gjenocidit nuk mund të shndërrohen asnjëherë në faktorë të paqes.
Kujtim i përhershëm për të gjitha viktimat e regjimit gjenocidal të Millosheviqit!/InLajmi
