Ministri i Mbrojtjes Armend Mehaj, ka shprehur keqardhje pas rastit të ushtarit hungarez të KFOR-it të cilit i’u amputua këmba për shkak të gjendjes së rënduar shëndetësore, duke qenë i lënduar nga ana e grupeve kriminale serbe gjatë protestave në Zveçan, përcjell InLajmi.
Mehaj tha se grupet kriminale përgjegjëse për sulmin ndaj pjesëtarëve të KFOR-it duhet të marrin dënimin që e meritojnë. Sipas tij dhuna është e papranueshme dhe se nuk mund të zmbraps ushtrimin e rendit e ligjit, mjeteve demokratike të pakontestueshme, të drejta e të domosdoshme për sigurinë e vendit dhe të qytetarëve të Republikës së Kosovës.
Ministri tutje i uroi shërim të shpejtë 26 ushtarëve të tjerë hungarez të plagosur, duke ju dëshiruar rikthim të shpejtë në kuadër të misionit të KFOR-it.
Postimi i plotë i tij:
Shpreh keqardhjen time me rastin e pranimit të informacionit se ushtarit hungarez të KFOR-it, të lënduar nga ana e grupeve kriminale serbe gjatë protestave në Zveçan, për shkak të gjendjes së rënduar shëndetësore është dashur që t’i amputohet këmba nga ana e mjekëve të Institutit Kombëtar të Rehabilitimit Mjekësor në Hungari.
Uroj që 26 ushtarët tjerë hungarez të plagosur sa më parë të rikuperohen, e të vazhdojnë angazhimin e tyre në kuadër të misionit të KFOR-it.
Grupet kriminale përgjegjëse për sulmin ndaj pjesëtarëve të KFOR-it duhet të marrin dënimin meritor, ngase dhuna është e papranueshme dhe asnjë formë nuk mund të zmbraps ushtrimin e rendit e ligjit, mjeteve demokratike të pakontestueshme, të drejta e të domosdoshme për sigurinë e vendit dhe të qytetarëve të Republikës së Kosovës/InLajmi/
