Kryetar i Aleancës për Ardhmërinë e Kosovës Ramush Haradinaj, ka përkujtuar familjen Bytyqi të cilët i’u bashkuan UÇK-së për çlirimin e atdheut, përcjell InLajmi.
Haradinaj tha se Agron, Yll e Mehmet Bytyqi pak ditë pas përfundimit të luftës u arrestuan nga shteti serb, ku më pas u ekzekutuan ata dhe shumë shqiptarë tjerë.
Kreu i AAK-së tha se Serbia vazhdon me injorimin dhe mohimin e krimeve dhe me dekorimin e kriminelëve të luftës, mes tyre edhe ata që dyshohen se vranë vëllezërit Bytyqi.
Ai tutje tha se heroizmi, humanizmi e atdhedashuria e Agronit, Yllit e Mehmetit do të kujtohen ndër breza dhe se kurr nuk do të ndalen përpjekjet për të çuar drejtësinë në vend për krimin e dëshmuar dhe vrasësit ta marrin dënimin e merituar.
Postimi i plotë i tij:
Agron, Yll dhe Mehmet Bytyqi, shtetas amerikanë, iu bashkuan rreshtit të Ushtrisë Çlirimtare të Kosovës në përpjekjet më vendimtare për lirinë e atdheut. Vetëm pak ditë pas përfundimit të luftës u arrestuan nga shteti serb, ku më pas u ekzekutuan.
Shteti serb, përpos që i ekzekutoi ata dhe shumë shqiptarë tjerë, vazhdon me injorimin dhe mohimin e krimeve dhe me dekorimin e kriminelëve të luftës, mes tyre edhe ata që dyshohen se vranë vëllezërit Bytyqi.
Sot e çdo ditë ndajmë dhembjen me familjen Bytyqi me bacën Ahmet e me zonjën Bahrije dhe bashkëluftëtarët e “Atlantikut”.
Heroizmi, humanizmi e atdhedashuria e Agronit, Yllit e Mehmetit do të kujtohen ndër breza!
Ne kurrë nuk do të ndalemi në përpjekjet për të çuar drejtësinë në vend për krimin e dëshmuar dhe vrasësit ta marrin dënimin e merituar.
Lavdi e përjetshme!/InLajmi/
