Kryeministri Albin Kurti, duke folur për punën e ekzekutivit tha se nuk do të ndalet së vepruari për zbatimin e zotimeve të dhëna ndaj qytetarëve, raporton InLajmi.
Ndërsa flet për zotimet, kryeministri përmend vendimin e Qeverisë për Ligjin për reformat pensionale që siguron njohjen e kontributeve të punëtorëve të viteve të 90-ta.
I pari i qeverisë duke folur për ndryshimet e miratuar në ligjin në fjalë Kurti tha se qeveritë e kaluara u kanë bërë padrejtësi personave që i kanë larguar me dhunë nga puna ish-regjimi i Serbisë.
“Duke ndryshuar Ligjin i cili do të mundësojë fitimin e së drejtës që të përfitojnë nga kontributet e tyre edhe ata që për shkak të largimit të dhunshëm nga puna nuk arritën që të përmbushin kushtin prej 15 vitesh kontribut. Kjo arritje i shtohet listës së çështjeve dhe problemeve që të tjerët nuk arritën që t’i zgjidhin për 20 vite e po i rregullojmë që në mandatin e parë, madje në gjysmën të mandatit. Kemi ende shumë punë para vetes por me durim e përkushtim do të arrijmë të përmbushim çdo gjë që e kemi premtuar deri në fund. Pavarësisht pengesave e gurëve që çdo ditë na i hedhin në rrugë, ne nuk ndalemi, i mbajmë dhe i përmbushim zotimet e dhëna ndaj qytetarëve tanë”, është shprehur kryeministri Kurti.
Ndërkohë, kryeministri kujtoi kohën e dhunës ku shumë punonjës të asaj periudhe janë dëbuar nga puna me dhunë nga pushtuesi serb.
“Këta qytetarë përjetuan pabarazi, gjatë largimit dhunshëm nga puna në kohën e ish-regjimit serb dhe nga pushtetet e kaluara të qeverive që nuk e kanë ndryshuar ligjin duke u mohuar skemën pensionale kësaj kategorie të qytetarëve. Jemi qeveria e vetme që kemi marrë veprime konkrete ligjore e po llogarisim pabarazinë”, tha Kurti.
Llogaritet se përfitues me ndryshimet e Ligjit për Skemat Pensionale janë rreth 70 mijë persona/InLajmi/
