Nënkryetarja e Partisë Demokratike të Kosovës Vlora Çitaku, ka reaguar ndaj videos ironizuese ndaj opozitës së Lëvizjes Vetëvendosje të cilën e quajti video me propagandë, shpifje e thjeshtëzime banale, përcjell InLajmi.
Derisa kritikoi partinë në pushtet, Çitaku ndalet tek qasja e kryeministrit Kurti ndaj partnerëve ndërkombëtarë ndërsa shprehet se shefi i ekzekutivit me sjelljen e tij avantureske po dërgon ujë në mulli të Vuçiqit.
Për më tepër, nënkryetarja e PDK-së pyet se përveç Serbisë interes i kujt është sanksionimi i Kosovës.
Tutje Çitaku tha se janë gati për zgjedhje të reja madje tha gati që sot.
Postimi i plotë i saj:
VV është në panik!
S’ju ka mbetur tjetër përveç videove me propagandë, shpifje e thjeshtëzime banale.
Ujë në mulli të Vuçiçit po dërgon vetë Albin Kurti, me qasjen e tij avantureske e të papërgjegjshme.
Interes i kujt, pos i Serbisë, është sanksionimi i Kosovës nga aleatët e armiqësimi ynë me gjithë botën?
Interes i kujt është pushtimi i mediave botërore me tituj që e përshkruajnë Kosovën si vatër krize, të polarizuar nga brenda e të izoluar nga jashtë?
Ndërkohë për zgjedhje të reja, jemi gati që sot. Mos u tutni/InLajmi/
