Anëtari i Kryesisë së Partisë Progresive Serbe, SNS-së, Petar Petkoviq, ka reaguar pas deklaratave të kryetares së Lëvizjes Evropiane të Serbëve për Kosovën Rada Trajkoviq, ndërsa theksoi se kjo e fundit “sulmon serbët në Kosovë me të njëjtin intensitet si shefi i saj Albin Kurti dhe me të njëjtë ideologji ku fajin kryesor për përshkallëzimin e krizës ia hedh Beogradit”.
“Sipas zakonit të vjetër të Rada Trajkoviqit, ajo sulmon serbët në Kosovë me të njëjtën forcë si shefi i saj Albin Kurti, dhe sipas të njëjtës frymë ideologjike, ku fajin kryesor për përshkallëzimin e krizës ia kalon Beogradit. Prandaj, nuk do të dëgjojmë asnjë fjalë nga Rada e Kurtit për të arrestuarit dhe të rrahurit e pafajshëm. Për serbët që janë në kazamatet e Prishtinës. Asgjë e çuditshme për dikë që kohë më parë është larguar nga trungu kombëtar serb për hir të interesit personal. Sipas Rada Trajkoviqit, Kurti ngjall dyshime te shqiptarët me veprimet e tij të dhunshme antiserbe, por jo tek ajo. Ajo tashmë është mësuar të shoqërohet me antiserbë të deklaruar si Bernard Kushner dhe nuk e ka të vështirë të punojë kundër interesave të popullit të vet edhe në këto momente të vështira për serbët në Kosovë”, tha Petkoviq.
Siç shtoi ai, prandaj edhe sot, “përderisa ajo pranon se Kosova është e ndarë nga Serbia, me miqtë e saj Kurtin dhe Sveçlën, ajo i kriminalizon të gjithë serbët në Kosovë të cilët kundërshtojnë dhunën e ushtruar ndaj tyre. Kështu ua përgatit terrenin, u krijon hapësirë dhe u jep alibi veprimeve të reja të njëanshme të drejtuara kundër popullit serb”.
Petkoviq tha se Beogradi po bën gjithçka për të ruajtur paqen.
“Por shteti dhe presidenti Aleksandar Vuçiq nuk do të lejojnë kurrë një dhunë të re dhe dëbim të serbëve, sado që Rada Trajkoviq përpiqet ta ndihmojë Kurtin të arrijë qëllimin e tij, që nënkupton Kosovën pa serb”, tha Petkoviq.
Trajkoviq ka vlerësuar më herët në N1 se presidenti i Serbisë, Aleksandar Vuçiq dhe kryeministri i Kosovës, Albin Kurti, janë fajtorët kryesorë për përshkallëzimin aktual të krizës në Kosovë.
Ajo gjithashtu kritikoi politikën e Aleksandër Vuçiqit ndaj Kosovës dhe theksoi se ai “instaloi në pushtet një mafi, të udhëhequr nga Veselinoviq, Radoiçiq dhe shefin e policisë për veriun, Bojiq”, shkruan Pink.rs.
Ajo deklaroi se “kanë punuar në mënyrë aktive për 10 vite që të kriminalizojnë jo vetëm veriun e Kosovës dhe se kanë zhvilluar një rrjet të tërë njerëzish”/InLajmi/
