Ministrja e Arsimit, Shkencës, Teknologjisë dhe Inovacionit Arbërie Nagavci, përmes një konferencë për media foli për punën që ka bërë Ministria përgjatë muajit qershor, raporton InLajmi.
Ajo ka bërë të ditur se shumë shpejt nxënësit do ta kenë lëndë zgjedhore Edukimin për Siguri. Gjithashtu Nagavci ka treguar se është mbajtur testi i arritshmërisë për të cilin njoftoi se do dilnin raporte mbi mbarëvajtjen e tij.
“Si dhe do vendosim si lëndë zgjedhore ‘Edukimin për Siguri’ për t’i njoftuar të rinjtë mbi atë se çka nevojitet për siguri. Si dhe është miratuar ligji për Agjencinë e Akreditimit. Do veçoja edhe Udhëzimin për këshilltarët për karrierë në shkolla të mesme të larta dhe nëpër gjimnaze. Këshilltari për karrierë ka rëndësi tejet të madhe për të ndërtuar vetëbesimin e nxënësve dhe për të krijuar mundësi suksesi për ta”, tha Nagavci.
Ministrja tha se në provimin e maturës shtetërore tha se menaxhimi i tij ka qenë më i mirë se sa në vitet paraprake dhe se provimi i 2-të do të mbahet në afatin e gushtit.
“Më lini të filloj me publikimin e rezultateve të maturës shtetërore ku kalueshmëria ka qenë 66.04%. Sigurisht që ka nevojë për punë të mëtutjeshme për të ndaluar kopjimin”, tha ajo.
“Në javën e kaluar besoj se keni parë që kemi marrë pjesë në programin Monitorimi në Siguri. Pos bashkëpunimit në mes të Ministrisë së Mbrojtjes dhe asaj të Arsimit kemi bashkëpunuar edhe me Forcat e Sigurisë”, u shpreh ministrja.
Nagavci tha se Valbona Mehmeti e ka fituar çmimin e Shkencëtarit të vitit që është shpallur në muajin qershor.
“170 mijë euro i kanë përfituar 7 organizata të cilat merren me identifikimin dhe avancimin e nxënësve me inteligjencë të jashtëzakonshme. Nxënësve që do garojnë në Olimpiadën e Matematikës në Tokio u janë ndarë tetë mijë euro të cilëve i’u uroj shumë sukses siç i uroj çdo nxënësi që përfaqëson Kosovën në gara të tilla”, u shpreh Nagavci.
