De-përshkallëzimi në Francë duket se po konfirmohet, me një mbrëmje të qetë gjatë të hënës në frontin e dhunës urbane, ndërsa Presidenti Emmanuel Macron pret sot kryetarët e rreth 220 bashkive që janë “viktima të abuzimit” në të gjithë vendin.
Takimi vjen pak orë pasi Macron shkoi në një stacion policie në Paris për të treguar mbështetjen e tij për policinë, ndërkohë që 45.000 agjentë e xhandarë u vendosën sërish në terren.
Rikthimi i paqes është pasur nga procesi i vlerësimit të dëmeve, të cilat përllogaritën në qindra miliona euro.
Sipas Florence Lustman, presidente e France Assureurs, 5.800 raste dëmesh në automjete u janë deklaruar deri më tani kompanive të sigurimit.
“Vlerësimi ynë është se këto dëme do të kushtojnë të paktën 280 milionë euro”, deklaroi ajo, duke shtuar se “ka shumë humbje që ende nuk janë deklaruar”.
Ndërkohë, Ministria e Brendshme njofton se që nga fillimi i trazirave në të gjithë Francën janë djegur 5892 automjete.
Gjatë netëve të dhunës që pasuan vdekjen e Nahelit, adoleshentit 17-vjeçar të vrarë nga një polic në Nanterre më 27 qershor, shumë shkolla në Francë u vunë po ashtu në shënjestër të rebelëve.
“Ne kemi 243 shkolla që kanë pësuar dëme“, tha ministri i Arsimit Pap Ndiaye për RTL të martën në mëngjes.
“Rreth 60 shkolla pësuan dëme të konsiderueshme nga zjarret, ndërsa 10 të tjera u shkatërruan, gjë që rrezikon pritjen e nxënësve për këtë javë dhe vë në pikëpyetje fillimin e vitit të ri shkollor”, shtoi ministri.
Në La Verrière (Yvelines), për shembull, Pap Ndiaye specifikoi se një çerdhe dhe një shkollë fillore do të duhet të rindërtohen plotësisht, pasi janë shkrumbuar
Plani i qeverisë është që në fillim të vitit shkollor, nxënësit që humbin shkollën do të shpërndahen nëpër institucione të tjera arsimore, derisa objekti i tyre të rikonstruktohet.
“Për të tjerët do të duhet të bëhen riparime që në fillim të vitit shkollor nxënësit të priten në kushte të kënaqshme. Kthimi i të gjithë nxënësve në shkollë në fillim të vitit është prioriteti ynë absolut”, këmbënguli ministri.
Ndërkohë, në terren zbritën edhe ministri i Ekonomisë Bruno Le Maire dhe ajo e Tregtisë, Olivia Grégoire. Në Essonne ata takuan tregtarët nga Saint-Germain-les-Arpajon dhe Arpajon, duke përçuar dy mesazhe.
Së pari me vendosmëri, që autorët e këtyre akteve të pafalshme do të ndëshkohen dhe i dyti premtim për mbështetjen, veçanërisht financiare.
Një ndër masat që qeveria mund të marrë është anulimi i tarifave dhe taksave për bizneset e goditura rëndë nga trazirat.
“Ne mund të konsiderojmë heqjen e tarifave sociale dhe tatimore rast pas rasti për tregtarët më të prekur. Këshilltarët e daljes nga kriza do të aktivizohen në secilin departament”, tha ministri i Ekonomisë.
Edhe federata e kompanive të sigurimit u ka bërë thirrje anëtarëve të saj të ndihmojnë biznesin.
France Assureurs u bën thirrje anëtarëve të saj të “zvogëlojnë” zbritjet për “tregtarët e vegjël të pavarur më të goditur” nga dhuna urbane, shkruan A2CNN
Gjithashtu i fton ata të zgjasin afatin e deklarimit të dëmeve në 30 ditë, krahasuar me 5 ditët e zakonshme, për të “përshpejtuar procesin e kompensimit” dhe për “lehtësimin e pagesës së depozitave për përballimin e situatave më të vështira”.
