Kryetari i Lidhjes Demokratike të Kosovës Lumir Abdixhiku, beson se përmes takimeve mbi partiake do të kërkojnë rrugën e re të Kosovës përballë politikave përplasëse të Qeverisë me aleatët historik, përcjell InLajmi.
Abdixhiku ndërkohë ka bërë të ditur takimet do të mbahen me opinionistë e gazetarë, organizatat e shoqërisë civile, profesorë universitarë e ish-diplomatë si dhe bizneset nga sektori privat.
Sipas tij në këto takime do diskutohet jo vetëm nevoja e ndërtimit të një mendimi e rrugëtimi të përbashkët euro-atlantik, por dhe propozimet për dalje nga kriza izoluese e tensionuese në të cilën gjendemi.
Kryetari i LDK-së tha se ka ftuar për angazhim të përbashkët të shoqërisë atyre që besojnë në Republikën e Kosovës dhe rrugëtimin e saj euroatlantik, dhe se ka ftuar si thirrje të fundit ndaj zhvillimeve të kohës.
Ai tutje u shpreh i lumtur ndaj reagimit të parë të kësaj inciative dhe në mbështetjen e dhënë nga vet akterët për këtë qëllim, ku tha se është i bindur se shoqëria kosovare ka masën kritike të domosdoshme brenda saj për të bërë gjënë e duhur në momentin e duhur.
Postimi i plotë i tij pa ndërhyrje:
Javën e shkuar kam shpalosur idenë e nisjes së artikulimit të një mendimi të përbashkët shoqëror, si rrugë e re e Republikës së Kosovës, përballë politikave përplasëse të Qeverisë së Kosovës me aleatët historik të saj dhe së këndejmi, rrezikimit të shtyllave qenësore të sovranitetit dhe vet shtetësisë sonë.
Kam ftuar për angazhim të përbashkët të shoqërisë sonë, atyre që besojnë në Republikën e Kosovës dhe rrugëtimin e saj euroatlantik, në artikulimin e qartë të kësaj rruge. Kam ftuar në angazhim mbipartiak e përtejpartiak si thirrje e fundit ndaj zhvillimeve të kohës.
Jam i lumtur me reagimin e parë publik ndaj vet iniciativës. Jam i lumtur me mbështetjen e gjerë të dhënë nga vet akterët për këtë qëllim. Jam i bindur se shoqëria kosovare ka masën kritike të domosdoshme brenda saj, për të bërë gjënë e duhur në momentin e duhur. Dhe ky është momenti i duhur.
Nga e mërkurja, do të organizojmë 4 takimeve të para; dhe atë me:
- Opinionistë e gazetarë;
- Organizata të shoqërisë civile;
- Profesorë universitarë e ish diplomatë; dhe
- Biznese nga sektori privat në vend.
Në të 4 takimet e para, do të shtrojmë jo vetëm nevojën e ndërtimit të një mendimi e rrugëtimi të përbashkët euro-atlantik, por dhe propozimet tona për dalje nga kriza e tanishme izoluese e tensionuese. Këto propozime do të përmbajtësohen nga vet pjesëmarrësit; e rruga e re e Republikës, do të lindë natyrshëm nga angazhimi gjithëshoqëror.
Kosova mundet më mirë. Kosova meriton më shumë/InLajmi/.
