Analisti politik, Ylli Hoxha, ka deklaruar se çdo herë që opozita flet për çështjen e veriut kundër kryeministrit të Kosovës, Albin Kurti, ata do të humbasin.
Hoxha ka theksuar se kryeministri Kurti dëshiron të rrëzohet nga opozita në mënyrë që pastaj të mund t’i shkelë ata përsëri në zgjedhje.
Ai gjithashtu ka shtuar se edhe nëse opozita e rrëzon Qeverinë, ata nuk ofrojnë as krijojnë zgjidhje për tensionet aktuale.
“Edhe po ta rrëzojnë Qeverinë nuk japin e as nuk krijojnë zgjidhje, nesër rrëzohet Albin Kurti çka bëjnë këta, cilën zgjidhje e bëjnë. Albin Kurti mezi nuk pret me krijua opozita një front që e rrëzon nesër ne parlament, i “shkel” të gjithë rend për gjashtë muaj. Domethënë çështja është se nuk është krijuar masa kritike, kapaciteti opozitar për me ndryshuar”, ka deklaruar Hoxha në Debat Plus.
Hoxha ka theksuar se çështja kryesore është mungesa e një mase kritike dhe kapaciteti i opozitës për të ndryshuar.
Sipas tij, kryetari i LDK-së, Lumir Abdixhiku, duhet të fokusohet në rigjenerimin e energjisë së opozitës dhe të përqendrohet në sfidat dhe dështimet e Qeverisë së Kurtit, siç janë shëndetësia, arsimi, ekonomia, infrastruktura, dhe të krijojë argumente bindëse për qytetarët, shkruan Telegrafi.
“Çfarë duhet të bëjë Lumir Abdixhiku është të rigjenerojë energji të cilat në të ardhmen të ballafaqohen me Qeverisjen e Albin Kurti dhe jo me veri, jo me na mbrojt Amerikën. Jo me përdor Amerikën për me sulmuar Albin Kurti, por me kqyr qysh është duke u udhëhequr shëndetësia, arsimi, ekonomia, infrastruktura, edhe secilën prej pikave me krijuar pole opozitare që me ua qel sytë qytetarëve për dështimin e Qeverisë”, ka thënë ai.
