Kryetari i Lidhjes Demokratike të Kosovës Lumir Abdixhiku, shprehet i shqetësuar për gjendjen në të cilën gjendet Kosova për shkak të humbjes së mbështetjes ndërkombëtare përcjell InLajmi.
Abdixhiku tha se derisa Kosova po humb mbështetje ndërkombëtare, Serbia është ajo që po e fiton këtë mbështetje ndërkombëtare.
Sipas tij, kauza e Serbisë për autonomi territoriale në Kosovë po merr formë, ndërsa ne thotë Abdixhiku mjaftohemi me të drejtën tonë në përballje me gjithë botën.
Për më tepër kreu i LDK-së shprehet se Albin Kurti nuk e bënë dot Kosovën shtet evropian, derisa ai dhe grupi i tij ideologjik janë në misionin e tyre të përplasjes përfundimtare të shtetit.
Postimi i plotë i tij:
Të dashur qytetarë të Republikës,
Albin Kurti nuk e bën dot Kosovën shtet evropian. Ai, grupi i tij ideologjik nga Tirana, analistët e paguar e mediat e pushtetit janë në misionin e tyre ultim të përplasjes përfundimtare të shtetit. Në sinkron, i pari na dërgon drejt përplasjes, të dytit e bëjnë këtë çmenduri të duket bukur.
E vërteta është e trishtë.
Kosova nuk ka qenë kurrë më keq ndërkombëtarisht se sa sot. Serbia nuk kanë pasur kurrë më shumë përkrahje ndërkombëtare se sa sot. Ata po fitojnë. Ne po humbasim. Kauza e tyre e autonomisë territoriale në Kosovë po merr formë teksa ne mjaftohemi me të drejtën tonë në përballje me gjithë botën.
Kosova ka një rrugë të re. Një që e dërgon shoqërinë tonë, gjeneratat e tashme e të ardhme drejt familjes euroatlantike. Një që fiton përballë Serbisë brenda e ndërkombëtarisht pa dallim. Kjo rrugë nuk ka Albin Kurtin në të. Këtë rrugë duhet ta bëjmë ne.
Për këtë rrugë na duhet ndihma e të gjithëve. E atyre që besojnë në Republikën, në rrugëtimin euroatlantik e në fundamentet bazike të kësaj shoqërie.
Prandaj, gjatë ditëve në vijim, do të ftoj akterë të shoqërisë civile, akademisë, sektorit privat, mërgatës, mediave e opinionistëve, partive politike, shqiptarëve në rajon e miqve të Kosovës nëpër botë për të ndërtuar rrugën e vërtetë. Do t’u prezantojë dhe planin e LDK-së për kapërcimin e izolimit e krizës. Në këto takime do të kërkoj mbështetje për ndërtimin e masës kritike e zërit alternativ që bota perëndimore duhet ta dëgjojë nga ne tani. Vendi ynë ka një të ardhme ndryshe nga çfarë na projektohet sot.
Kosova mundet më mirë.
Kosova meriton më shumë/InLajmi/.
