Zëvendëskryeministri i Maqedonisë së Veriut, Artan Grubi, tha se partnerët ndërkombëtarë kanë kërkuar nga ai dhe nga kryetari i BDI-së, Ali Ahmeti, që të ndihmojnë në komunikim me Qeverinë e Kosovës.
“Drejtpërdrejt kanë kërkuar nga zotëri Ahmeti si një person i cili ushtron kredibilitet e respekt në Kosovë edhe nga ne që të ndihmojmë në komunikimin me Qeverinë e Kosovës dhe në tejkalimin e situatës e cila po ndodhte në veri, por edhe në zbatimin e marrëveshjes së Ohrit dhe në zbatimin e marrëveshjeve tjera në veçanti në dialog”, tha Grubi
Sipas tij, Kosova nuk duhet të diskutoj me Serbinë për kompromise, por vetëm për njohje reciproke.
“E përshëndes aktin e kthimit të policëve, por ai nuk duhet të kishe ndodhur asnjëherë. Vlerësoj se duhet të bëhen hapa deciziv nga Serbia, demonstrimi i dialogut konstruktiv me Kosovën, sepse Serbia e din që Kosovën e ka të humbur, ata po punojnë për kompromisin të cilin duan ta arrijnë dhe po pozicionohen që kompromisi të jetë sa më i volitshëm për ta, ne nuk duhet ta luajmë rolin e diskutimit për kompromisin kur synimin e kemi njohjen e ndërsjellë”, tha Grubi.
Duke folur për Ballkanin e Hapur, zyrtari i Qeverisë maqedonase tha se zhvillimet e fundit që ndodhën edhe në veri të Kosovës e zbehën këtë iniciativë, shkruan KlanKosova
“Nuk ka ndonjë aktivitet i cili do të organizohet në kuadër të Ballkanit të Hapur. Në këto rrethana në të cilat ishim e patë edhe qëndrimin e Ramës, edhe ne jemi të të njëjtit qëndrim që nuk ka ndonjë atmosferë konstruktive për rajonin”, tha Zëvendëskryeministri i Maqedonisë së Veriut, Artan Grubi.
