Departamenti amerikan i Shtetit sërish ka kërkuar nga Kosova dhe Serbia të ndërmarrin hapa urgjentë në depërshkallëzimin e situatës dhe t’i kthehen dialogut të ndërmjetësuar nga Bashkimi Evropian.
DASH ka theksuar se Shtetet e Bashkuara dhe Bashkimi Evropian janë shumë të qartë për pritshmëritë e tyre nga të 2 palët Kosova dhe Serbia.
“Ne vazhdojmë t’i bëjmë thirrje Serbisë dhe Kosovës që të ndërmarrin hapa urgjent, konkretë për të de-përshkallëzuar tensionet. Kjo përfshin lirimin pa kushte të tre policëve të Kosovës të ndaluar në Serbi”, thuhet në një përgjigje të DASH-it
Më tej, Departamenti amerikan i Shtetit thotë se “të 2 palët duhet të ndjekin planin e propozuar nga Bashkimi Evropian dhe të kthehen pa vonesë në dialogun e ndërmjetësuar nga BE-ja”.
Ndërsa, Shefi i Politikës së Jashtme të Bashkimit Evropian, Josep Borell, sot u shpreh “i alarmuar” me situatën e tensionuar në veri të Kosovës, shkruan VOA
Ai ka thënë se po bëhen arrestime të jashtëligjshme të serbëve në Kosovë, ndërsa ka përmendur edhe marshimin e pjesëtarëve të Forcës së Sigurisë së Kosovës në Mitrovicë.
