Kryetari Lumir Abdixhiku ka bërë homazhe në nderim të ish ministres së LDK-së Nekibe Kelmendi në përvjetorin e vdekjes së saj, përcjell InLajmi.
Duke kujtuar si një grua të fortë që la gjurmë të pashlyeshme dhe veprimtare e paepur e çështjes kombëtare, Abdixhiku tha se në këtë rrugëtim të vështirë ajo ishte bashkëpunëtore e pa lëkundur e presidentit historik Ibrahim Rugova.
Për më tepër Abdixhiku tha se avokatja Nekibe Kelmendi mbetet sinonim i forcës së një gruaje të hekurt që punoi pareshtur për lirin e konsolidimin e Republikës së Kosovës.
Njoftimi i plotë nga LDK:
Në dymbëdhjetë vjetorin e vdekjes së veprimtares së madhe të Kosovës, Nekibe Kelmendi, kryetari i Lidhjes Demokratike të Kosovës, Lumir Abdixhiku bashkë me Kosovaren të bijën e Nekibe dhe Bajram Kelmendit dhe bashkëpunëtorë bënë homazhe dhe nderuan jetën e veprën e saj.
“Dymbëdhjetë vjet kur Kosovarja humbi nënën e saj, por fitoi zemrat e shumë nënave tjera shqiptare që e kujtojnë atë për forcën dhe durimin përkundër sfidave jetësore që kishte.
Nekibe Kelmendi është sinonim i forcës së një gruaje të hekurt që punoi pareshtur për lirinë e konsolidimin e Republikës tonë. Ajo la gjurmë të pashlyeshme si veprimtare e paepur e çështjes kombëtare, aktiviste politike, avokate, deputete e ministre e drejtësisë. Në këtë rrugëtim të vështirë, në orët më të rënda për vendin ajo ishte bashkëpunëtore e palëkundur e Presidentit Historik, Dr. Ibrahim Rugova.
Bashkë me bashkëshortin e saj, Bajram Kelmendin, ishin veprimtarë të lirisë në përpjekjen e pashtershme për të denoncuar gjenocidin serb mbi popullsinë shqiptare në Kosovë. Bajram Kelmendi dhe djemtë e tyre, Kastrioti 30 vjeç e Kushtrimi 16 vjeç u flijuan për këtë vend, kurse Nekibja dhimbjen e paimagjinueshme e shndërroi në përkushtim të jashtëzakonshëm për lirinë dhe pavarësinë e vendit. Familja Kelmendi do të kujtohen gjithmonë me nderim të veçantë për sakrificën e madhe në altarin e lirisë; ndërsa LDK dhe Republika e Kosovës do t’i mbajë në kujtesë e nderim të përjetshëm.
Ikja e hershme e Nekibe Kelmendit, la zbrazëti në jetën politike e profesionale, por ajo ka lënë një trashëgimi politike e humane që mbetet vlerë për vendin tonë e gjurmët, sakrifica dhe puna e saj tashmë janë një udhërrëfyes për të gjithë ne që të ecim përpara.”/InLajmi/
