Në Strugë të Maqedonisë së Veriut, Kryeministri i Republikës së Kosovës, Albin Kurti, takoi Presidentin e Kroacisë, Zoran Milanoviq, teksa 2-të po marrin pjesë në Forumin e Prespës, përcjell InLajmi.
U bisedua për marrëdhëniet e shkëlqyeshme dypalëshe dhe për fushat me potencial të thellimit tyre. Kryeministri Kurti falënderoi presidentin Milanoviq për përkrahjen e vazhdueshme që Kroacia i ka dhënë shtetit të Kosovës, si një kontribues i rëndësishëm i paqes dhe sigurisë rajonale, dhe për mbështetjen e fuqishme në arenën ndërkombëtare.
U fol edhe për zhvillimet në vend, situatën pas zgjedhjeve të 23 prillit dhe për veprimin agresor të Serbisë vetëm disa ditë më parë ndaj Kosovës. Kryeministri Kurti tha se Serbia ka shkelur sovranitetin dhe integritetin territorial të Republikës së Kosovës, kur nga brendia e territorit të Kosovës ka rrëmbyer 3 policë të Kosovës.
Ai tha se një sjellje e tillë e Serbisë, që për më tepër vjen në momentin kur depërshkallëzimi i situatës në veri të vendit është synim i përbashkët, duhet të dënohet nga i gjithë faktori ndërkombëtar dhe të bëhet thirrje nga të gjithë që 3 policët që po mbahen padrejtësisht në Serbi, duhet të lirohen menjëherë dhe pa kushte. /InLajmi/
