Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, të premten janë takuar me anëtarë të Kryesisë së Institutit për krimet gjatë luftës në Kosovë, ku diskutuan për zyrtarizmin e numrit të vërtetë të fëmijëve të vrarë gjatë luftës gjenocidiale në Kosovë, raporton InLajmi
Anëtar i Kryesisë së Institutit për krimet gjatë luftës në Kosovë, Nysret Pllanës tha se numri i saktë I fëmijëve të vrarë gjatë luftës së fundit në Kosovë është 1432.
“Së pari, në Kosovë janë vrarë 1432 fëmijë që dihen deri tashti. Sepse janë shumë gra që janë vrare kur ishin shtatzëna, edhe në muajin 8 e të 9, që nuk është folur kurrë për fëmijët e tyre të vrarë në barkun e nënës shqiptare. Po ashtu, përkundër këmbënguljes sonë, për të pasur një statistike të saktë, e cila është përmbledhur në këtë botim, ka mundësi që të mos janë përfshirë të gjithë fëmijët e vrare në Kosove nga viti 1981 deri më 1999. Në këtë libër i keni me date, me ditë e me fotografi, vrasjen e 1392 fëmijëve shqiptare gjate viteve 1998/1999, dhe vrasjen e 40 fëmijëve shqiptare gjate viteve 1981/1997, po nga ushtria dhe policia barbare serbe”, tha Pllana.
Në nderim të tyre, u kërkua që të ndërtohet një obelisk në Kosovë, e ku lokacioni është përcaktuar në Aeroportin Ndërkombëtar “Adem Jashari”.
E ndërtimi i Obeliskut afër aeroportit “Adem Jashari”, nuk pritet të ketë implikime buxhetore, pasi ndërtimin e saj e ka marrë përsipër Liga Shqiptaro-Amerikane
“Kërkesa ime, andaj edhe kërkesa e familjeve të këtyre 1432 fëmijëve të vrarë, është që të përjetësohen në Kompleksin Memorial në formë obelisku, në mënyrë që të kemi ku të vëmë një buqetë me lule. Dikush nga ju mund ta dijë, dikush nga ju ka mundur të ketë dëgjuar, sepse këto përpjekje i kemi bere me vite, se afër Aeroportit ndërkombëtar ‘Adem Jashari’ është caktuar vendi prej një hektarësh (dhurate nga Komuna e Lipjanit) është të vënë maskota e një obelisku. Donator është Liga shqiptaro-amerikane”, tha Pllana /InLajmi/
