Ka përfunduar mbledhja, e quajtur “konsultative” e Komisionit të Pavarur të Mediave ndërsa kryetari i KPM-së, Jeton Mehmeti është deklaruar pas përfundimit të mbledhjes për gazetarët.
Mehmeti është shprehur se mbledhja ka qenë konsultative dhe është biseduar për agjendën e nesërme.
“Kemi mbajtur një mbledhje onsultative në të cilën kemi biseduar për agjendën e nesërme dhe i kemi sqaruar pikat dhe mbledhja do të mbahet nesër, do të jetë e hapur për publikun dhe të gjithë janë të mirëseardhur.”, tha Mehmeti.
Më tutje, ai është shprehur se Klan Kosova do të jetë një prej temave që do të diskutohet nesër.
“Klan Kosova është një prej temave që do të diskutohet nesër dhe për këtë e kemi bërë njoftimin por kemi edhe shumë pika të tjera të rendit të ditës pasi komisioni s’ka qenë funksional për 7 muaj.”, tha Mehmeti.
Në pyetjen se çfarë pritet të ndodh nesër lidhur me Klan Kosovën, ai ka thënë se të gjithë anëtarët e kanë të drejtën e mendimit të tyre dhe vendimi merret si pasojë e kësaj.
“Çdo vendim që e merr komisioni fillimisht i prin një diskutim në të cilën çdo anëtar ka të drejtë shprehjen e mendimit të tij dhe në fund mund të merret një vendim ose jo.”, tha Mehmeti.
Përndryshe, Ministria e Industrisë, Ndërmarrësisë dhe Tregtisë ka nxjerrë një vendim ku kërkohet revokimi i licensës për televizionin Klan Kosova gjë që është kritikuar ashpër në publik.
